राजु देवडे
लोणी धामणी : अवसरी बु, येथील भीमाशंकर सहकारी साखर कारखान्याने गाळप हंगाम २०२३-२४ मध्ये गाळप होणा-या ऊसास पहिली उचल रु. २९५०/- प्रती मे. टनाप्रमाणे देण्याचा निर्णय घेतला आहे. महाराष्ट्र राज्याचे सहकार मंत्री व कारखान्याचे संस्थापक-संचालक मा. ना. श्री. दिलीपराव वळसे पाटील यांच्या मार्गदर्शनाखाली झालेल्या मा. संचालक मंडळ सभेमध्ये निर्णय घेण्यात आल्याची माहिती कारखान्याचे चेअरमन बाळासाहेब बेंडे यांनी दिली.
पुढे बोलताना बाळासाहेब बेंडे म्हणाले की, कारखान्याने आत्तापर्यंत कार्यक्षेत्र व परिसरातील ऊस उत्पादक शेतक-यांना नेहमीच चांगला दर दिलेला आहे. गाळप हंगाम २०२३-२४ करिता केंद्र शासनाने दिनांक ०६/०७/२०२३ चे परिपत्रकान्वये द्यावयाचा एफ. आर. पी दर निश्चित केलेला आहे. त्याप्रमाणे कारखान्याचा सन २०२२-२३ गाळप हंगामातील सरासरी साखर उताऱ्यानुसार एफ.आर.पी दर रु. २८५३. ५७ प्रती मे. टन येत आहे.
तथापी सन २०२३-२४ हंगामात गाळप होणा-या ऊससाठी पहिली उचल रु. २९५०/- प्रती मे. टन देण्याचा निर्णय घेतलेला असून पंधरावडा ऊस बिलाप्रमाणे उत्पादक शेतक-यांच्या बॅंक खात्यावर रक्कम वर्ग करण्यात येणार आहे. त्यामुळे ऊस उत्पादक शेतक-यामध्ये आंनदाचे वातावरण आहे. कारखान्याचा सन २०२३-२४ चा गाळप हंगाम दिनांक ०७/११/२०२३ रोजी सुरु झाला असून आज अखेर १ लाख ५५ हजार मे.टन ऊसाचे गाळप झालेले असून हंगामात कारखाना कार्यक्षेत्र व परिसरात झालेल्या नोंदीनुसार ९.०० लाख मे.टन ऊस गाळप करण्याचे उद्दिष्ट ठेवलेले आहे.
त्यादृष्टीने ट्रक / ट्रॅक्टर टोळीसह, ट्रॅक्टर टायरगाडी, बैलटायरगाडी व हार्वेस्टरचे करार केलेले असून त्याप्रमाणे यंत्रणा हजर झालेली आहे. कारखान्याने आधुनिकीकरण व विस्तारीकरणाची कामे केल्यामुळे गाळप क्षमतेत वाढ झालेली असल्याने ऊस उत्पादकांचे संपूर्ण ऊसाचे वेळेत गाळप होण्यास मदत होणार आहे. तरी कार्यक्षेत्र व परिसरातील ऊस उत्पादक शेतक-यांनी भीमाशंकर कारखान्यास जास्तीत जास्त ऊस गाळपास देवून सहकार्य करावे असे आवाहन व्हाईस चेअरमन प्रदीप वळसे पाटील यांनी केले.
जाहीर केलेला दर रु. २९५०/- प्रति मे.टन पहिली उचल असून अंतिम उस दर प्रथेप्रमाणे कारखान्याचे संस्थापक संचालक व राज्याचे सहकार मंत्री मा.ना.श्री. दिलीपराव वळसे पाटील हे कारखान्याच्या वार्षिक सर्वसाधारण सभेत जाहीर करत असतात त्यामुळे जास्तीचा उस दर मिळणे अपेक्षित आहे. असे कारखान्याचे चेअरमन मा.श्री. बाळासाहेब बेंडे यांनी सांगितले.
