बारामती : राष्ट्रवादी काँग्रेसचे अध्यक्ष आणि राज्याचे उपमुख्यमंत्री अजित पवार यांच्या अपघाती निधनानंतर रिक्त झालेल्या बारामती विधानसभा मतदारसंघातील पोटनिवडणुकीसाठी निवडणूक आयोगाने हालचाली वेगाने सुरू केल्या आहेत. विशेष संक्षिप्त मतदारयादी पुनर्परीक्षण कार्यक्रम जाहीर करण्यात आला असून 1 जानेवारी 2026 पर्यंत नोंद असलेले मतदारच या पोटनिवडणुकीत मतदान करू शकणार आहेत. तर राज्यसभा निवडणुकीसाठी पार्थ पवार यांना उमेदवारी देण्याचा महत्त्वाचा निर्णयही पक्षाच्या कोअर कमिटीने घेतल्याची माहिती आहे. (Baramati)
या मतदारसंघाची अंतिम मतदारयादी 10 मार्च रोजी प्रसिद्ध होणार आहे. प्रारूप यादी जाहीर झाल्यानंतर कोणत्याही क्षणी निवडणूक कार्यक्रम जाहीर होण्याची शक्यता वर्तवली जात आहे.
दरम्यान, बारामती पोटनिवडणुकीसाठी उपमुख्यमंत्री सुनेत्रा पवार यांचे नाव जवळपास निश्चित झाल्याची माहिती समोर आली आहे. अजित पवार यांच्या निधनानंतर निर्माण झालेल्या सहानुभूतीच्या पार्श्वभूमीवर पक्षाने ही निवडणूक बिनविरोध करण्यावर भर देण्याची भूमिका घेतल्याचे सूत्रांनी सांगितले. राष्ट्रवादी काँग्रेसच्या कोअर कमिटीच्या बैठकीत पोटनिवडणूक लढविण्याबाबत एकमत झाल्याचे समजते.
पार्थ पवार राज्यसभेच्या रिंगणात
आगामी राज्यसभा निवडणुकीसाठी पार्थ पवार यांना उमेदवारी देण्याचा महत्त्वाचा निर्णयही पक्षाच्या कोअर कमिटीने घेतल्याची माहिती आहे. सोमवारी रात्री मुंबईत राष्ट्रवादी काँग्रेस पक्ष आयोजित बैठकीत या नावावर शिक्कामोर्तब करण्यात आले. ही बैठक प्रफुल पटेल यांच्या मुंबईतील निवासस्थानी पार पडली.
बैठकीला प्रदेशाध्यक्ष सुनील तटकरे यांच्यासह कोअर कमिटीचे सदस्य उपस्थित होते. तसेच 26 फेब्रुवारीला होणाऱ्या राष्ट्रीय अध्यक्ष निवडीसंदर्भातील राष्ट्रीय कार्यकारिणी बैठकीच्या तयारीवरही चर्चा झाल्याचे कळते.
येत्या काही दिवसांत वरळी डोम येथे पक्षाची राष्ट्रीय कार्यकारिणी बैठक होणार असून, त्यामध्ये सुनेत्रा पवार यांच्या नावावर राष्ट्रीय अध्यक्ष म्हणून औपचारिक शिक्कामोर्तब होण्याची शक्यता व्यक्त केली जात आहे. महाराष्ट्रातील राजकीय घडामोडींना त्यामुळे वेग आला आहे.
