लोणी काळभोर, ता. २६ : मुळशी महाराष्ट्र राज्य वीज तांत्रिक कामगार सहकारी पतसंस्थेच्या अध्यक्षपदी बाळासाहेब लक्ष्मण सायकर, उपाध्यक्षपदी संतोष अनंता केसवड आणि सचिवपदी विश्वास शिवाजी धुमाळ यांची बिनविरोध निवड करण्यात आली.
सन २०२६ ते २०३१ या पंचवार्षिक कालावधीसाठीच्या संचालक मंडळाच्या निवडणुकीनंतर झालेल्या पहिल्या सभेत अध्यक्ष, उपाध्यक्ष आणि सचिवपदाची निवड पार पडली. या सभेच्या अध्यक्षस्थानी निवडणूक निर्णय अधिकारी तथा अध्यासी अधिकारी उमेश धिटे उपस्थित होते. अध्यक्षपदासाठी बाळासाहेब सायकर, उपाध्यक्षपदासाठी संतोष केसवड आणि सचिवपदासाठी विश्वास धुमाळ यांचे प्रत्येकी एकमेव अर्ज प्राप्त झाल्याने तिन्ही पदांवरील निवड बिनविरोध जाहीर करण्यात आली.
नवनिर्वाचित संचालक मंडळामध्ये अध्यक्ष बाळासाहेब लक्ष्मण सायकर, उपाध्यक्ष संतोष अनंता केसवड, सचिव विश्वास शिवाजी धुमाळ यांच्यासह मंगेश महादेव पारखी, विकास वामन जाधव, संदीप शिवाजी बनकर, अमोल तुकाराम शेलार, सुकलाल वामनराव जाधव, प्रणाली मुकेश शिर्के, छाया प्रभाकर पंचाळे आणि राजाराम दत्तू जाधव यांचा समावेश आहे.
यावेळी नवनिर्वाचित अध्यक्ष बाळासाहेब सायकर यांनी सर्व संचालकांना विश्वासात घेऊन पतसंस्थेचा कारभार पारदर्शक, गतिमान आणि सभासदाभिमुख पद्धतीने चालविण्याचा निर्धार व्यक्त केला. वीज कर्मचाऱ्यांच्या हिताला सर्वोच्च प्राधान्य देत संस्थेच्या आर्थिक प्रगतीसाठी आणि सभासदांच्या कल्याणासाठी सातत्याने कार्य करण्याचा संकल्प त्यांनी यावेळी व्यक्त केला.
