अक्षय टेमगिरे
शिरूर : जागतिक अमली पदार्थ विरोधी दिनानिमित्त शिरूर पोलीस स्टेशनच्या वतीने मंगळवारी शिरूर शहरात अमली पदार्थांविरोधात जनजागृती करण्यासाठी भव्य रॅलीचे आयोजन करण्यात आले असून. या रॅलीत विद्यार्थ्यांनी उत्स्फूर्त सहभाग घेत नागरिकांना व्यसनमुक्तीचा संदेश दिला आहे .
रॅलीची सुरुवात विद्याधाम शाळा येथून झाली. त्यानंतर इंदिरा गांधी पुतळा, बसस्थानक, जैन मंदिर, पाच कंदील चौक, राम आळी, बीजे कॉर्नर या मार्गाने पुन्हा विद्याधाम शाळेत रॅलीची सांगता झाली.
रॅलीदरम्यान १०० ते १२० विद्यार्थ्यांनी अमली पदार्थांच्या सेवनामुळे होणारे दुष्परिणाम दर्शविणारे फलक हातात घेऊन घोषणाबाजी केली.
अमली पदार्थांना नकार, निरोगी जीवनाचा स्वीकार असा संदेश देत विद्यार्थ्यांनी नागरिकांमध्ये जनजागृती केली. या उपक्रमात शिरूर पोलीस स्टेशनचे अधिकारी, पोलीस अंमलदार तसेच शाळेचे शिक्षक सहभागी झाले होते.
रॅलीनंतर विद्याधाम शाळेत आयोजित कार्यक्रमात शाळेचे प्राचार्य आणि पोलीस अधिकाऱ्यांनी विद्यार्थ्यांना अमली पदार्थांच्या सेवनामुळे होणारे शारीरिक, मानसिक, सामाजिक आणि कायदेशीर दुष्परिणाम याविषयी सविस्तर मार्गदर्शन केले.
तसेच व्यसनमुक्त जीवनशैलीचा स्वीकार करून समाजातही जनजागृती करण्याचे आवाहन करण्यात आले आहे.
संपूर्ण कार्यक्रम उत्साहपूर्ण आणि शांततापूर्ण वातावरणात पार पडला. या उपक्रमामुळे विद्यार्थी आणि नागरिकांमध्ये अमली पदार्थांविषयी जागरूकता निर्माण होण्यास मोठी मदत झाल्याचे आयोजकांनी सांगितले आहे.
