उरुळी कांचन (पुणे) : उरुळी कांचन येथील महात्मा गांधी विद्यालयातील विद्यार्थ्यांनी विविध शालेय क्रीडा स्पर्धांमध्ये घवघवीत यश संपादन केले. बॉक्सिंगमध्ये दोन सुवर्णपदके व एक कांस्यपदक, सेपक टकरा स्पर्धेत प्रथम व द्वितीय क्रमांक, तर कबड्डीत उपविजेतेपद पटकावत विद्यार्थ्यांनी विद्यालयाच्या शिरपेचात मानाचा तुरा रोवला आहे. विशेष म्हणजे, अनेक खेळाडूंची पुढील स्तरावरील स्पर्धांसाठी निवड झाली असून, विभागीय बॉक्सिंग स्पर्धेत यशवर्धन कांचन याने कांस्यपदक मिळवून विद्यालयाच्या यशात आणखी भर घातली आहे. अशी माहिती विद्यालयाच्या प्राचार्या संगीता शिर्के यांनी दिली.
लोणी काळभोर येथील एमआयटी विश्वशांती गुरुकुल येथे झालेल्या जिल्हास्तरीय बॉक्सिंग स्पर्धेत विद्यालयाच्या खेळाडूंनी उत्कृष्ट कामगिरी केली. यामध्ये कु. हरमनप्रीत कौर हिने 17 वर्षे वयोगटातील 42 किलोखालील गटात, तर यशवर्धन कांचन याने 17 वर्षे वयोगटातील 52 किलो गटात प्रथम क्रमांक मिळवत सुवर्णपदक पटकावले. लोकेश जगदाळे याने 14 वर्षे वयोगटातील स्पर्धेत कांस्यपदक मिळविले. या यशस्वी कामगिरीच्या जोरावर हरमनप्रीत कौर व यशवर्धन कांचन यांची विभागीय बॉक्सिंग स्पर्धेसाठी निवड झाली. पुढे विभागीय स्तरावरील स्पर्धेत यशवर्धन कांचन याने कांस्यपदक पटकावत आपली गुणवत्ता सिद्ध केली.
टी. सी. कॉलेज, बारामती येथे आयोजित जिल्हास्तरीय सेपक टकरा स्पर्धेतही विद्यालयाच्या खेळाडूंनी शानदार कामगिरी केली. 17 वर्षे वयोगटातील मुलांच्या संघाने प्रथम क्रमांक पटकावून विभागीय स्पर्धेत प्रवेश निश्चित केला. तसेच 14 वर्षे आणि 19 वर्षे वयोगटातील मुलांच्या संघांनी द्वितीय क्रमांक मिळवत विद्यालयाच्या यशात भर घातली.
शिवछत्रपती क्रीडानगरी, बालेवाडी येथे झालेल्या हवेली तालुकास्तरीय मैदानी स्पर्धेत विद्यालयाच्या खेळाडूंनी आपली क्षमता सिद्ध केली. 17 वर्षे वयोगटातील पाच किलोमीटर चालण्याच्या स्पर्धेत अभिजीत मच्छिंद्र भागवत याने प्रथम, तर स्वराज राजेंद्र कांचन याने द्वितीय क्रमांक पटकावला. थाळीफेक स्पर्धेत हर्षवर्धन सोमनाथ डंबरे याने द्वितीय क्रमांक मिळविला. या तिन्ही खेळाडूंची जिल्हास्तरीय स्पर्धेसाठी निवड झाली आहे. याशिवाय, 17 वर्षे वयोगटातील मुलांच्या 4 × 400 मीटर रिले संघाने तृतीय क्रमांक मिळवला. तालुकास्तरीय शालेय कबड्डी स्पर्धेत खेळाडूंनी जिद्द, चपळाई आणि संघभावनेच्या जोरावर द्वितीय क्रमांक मिळवत उपविजेतेपद पटकावले.
दरम्यान, विद्यार्थ्यांच्या या यशामागे शारीरिक शिक्षण शिक्षक कुंभारकर सर, विमल कांचन, माने सर, विक्रांत पंडित सर आणि तानाजी मेंढे सर यांचे मोलाचे मार्गदर्शन लाभले. विद्यार्थ्यांच्या या यशाबद्दल संस्थेचे उपाध्यक्ष, सचिव, सर्व विश्वस्त व पदाधिकारी, विद्यालयाच्या प्राचार्या संगीता शिर्के, प्रशासकीय वर्ग, शिक्षक आणि शिक्षकेतर कर्मचारी यांनी सर्व यशस्वी खेळाडू व मार्गदर्शकांचे अभिनंदन केले. तसेच आगामी स्पर्धेसाठी शुभेच्छा दिल्या.
