पुणे : पुण्यातील पर्वती दर्शन परिसरात पोलिसांत तक्रार देण्यासाठी चाललेल्या एका तरुणावर भरदिवसा कोयत्याने जीवघेणा हल्ला करण्यात आल्याची घटना समोर आली आहे . या गंभीर प्रकरणी पर्वती पोलिसांनी तात्काळ कारवाई करत एका 18 वर्षीय आरोपीला बेड्या ठोकल्या आहेत.
शुक्रवारी दुपारी अडीचच्या सुमारास ही थरारक घटना घडली. जनता वसाहत, पर्वती पायथा येथील गल्ली क्रमांक 37 मध्ये राहणारे निलेश चंद्रकांत धुमक (वय 30) हे आपल्या घरी जेवण करत होते. यादरम्यान त्यांचा काही कारणावरून त्यांच्या वडिलांसोबत वाद झाला. या भांडणाचा आवाज ऐकून त्यांचा शेजारी राहणारा वैभव गणेश वेदपाठक (वय 18) तिथे आला. ‘तुमच्या रोजच्या भांडणांमुळे आम्हाला त्रास होतो,’ असे म्हणत वैभवने निलेशला शिवीगाळ करत मारहाण केली.
या प्रकारानंतर झालेल्या मारहाणीची तक्रार नोंदवण्यासाठी निलेश पोलीस चौकीकडे निघाला होता. मात्र, वाटेतच आरोपी वैभवने त्याला गाठले आणि त्याच्यावर थेट कोयत्याने वार केला. या प्राणघातक हल्ल्यात निलेश गंभीर जखमी झाला. तरीही जिद्दीने त्याने कसेतरी पोलीस चौकी गाठली आणि घडलेल्या सर्व प्रकाराची सविस्तर माहिती दिली.
हल्ला करून आरोपी वैभव घटनास्थळावरून फरार झाला होता. मात्र, पर्वती पोलिसांनी तातडीने सूत्रे हलवत आरोपी वैभव वेदपाठकला जेरबंद केले. पोलीस उपनिरीक्षक प्रकाश खिलारी या प्रकरणाचा पुढील तपास करत आहेत. या घटनेमुळे परिसरात एकच दहशत पसरली असून नागरिकांमध्ये संतापाचे वातावरण आहे.
