लोणी काळभोर, ता. 6: पुणे विभागीय वेटलिफ्टिंग स्पर्धेत लोणी काळभोर (Loni Kalbhor) (ता. हवेली) येथील इंग्लिश मीडियम स्कूल या इंग्रजी माध्यमाच्या शाळेची विद्यार्थिनी आर्या अण्णाराव गायकवाड हीने सुवर्ण पदक पटकाविले आहे. आर्याच्या यशामुळे सर्वत्र कौतुक होत असून तिच्यावर सामाजिक, राजकीय, शैक्षणिक व क्रीडा क्षेत्रातील अधिकारी व पदाधिकाऱ्यांकडून शुभेच्छांचा वर्षाव होत आहे.
महाराष्ट्र राज्य क्रीडा व युवक संचालनालय व पुणे जिल्हा क्रीडा विभागाच्या वतीने पुणे विभागीय वेटलिफ्टिंग क्रीडा स्पर्धा 2025-26 या राजगुरुनगर (ता. खेड) येथील हुतात्मा राजगुरू महाविद्यालयात रविवारी (ता.5) पार पडल्या. या स्पर्धेत विभागातील शेकडो विद्यार्थ्यांनी सहभाग घेतला होता. या स्पर्धेत लोणी काळभोर येथील इंग्लिश मीडियम स्कूलची विद्यार्थिनी आर्या गायकवाड सहभागी झाली होती.
या स्पर्धेत आर्या गायकवाड हिने 17 वर्षाखालील 63 किलो वजनी गटात सुवर्णपदक पटकावले. यावेळी उपस्थित मान्यवरांच्या हस्ते आर्याला पदक व प्रशस्तीपत्रक देऊन गौरविण्यात आले. आर्याची नाशिक येथे होणाऱ्या राज्यस्तरीय स्पर्धेसाठी निवड झाली आहे. तिला या यशासाठी क्रीडा शिक्षक गणेश नगीने व शिक्षिका शाहीन शेख यांचे बहुमुल्य मार्गदशन मिळाले.
दरम्यान, आर्याने विभागात सुवर्ण पदक पटकाविल्यानंतर तिचा सत्कार श्री स्वामी विवेकानंद शिक्षण संस्थेचे सहसचिव (प्रशासन ) तथा पृथ्वीराज कपूर विद्यालयाचे प्राचार्य सीताराम गवळी यांच्या हस्ते करण्यात आला.
यावेळी इंग्लिश मीडियम स्कूलच्या प्राचार्या पौर्णिमा शेवाळे, शिक्षक, शिक्षकेत्तर कर्मचारी व विद्यार्थी मोठ्या संख्येने उपस्थित होते. आर्याच्या या यशाचे लोणी काळभोरसह परिसरातील नागरिकांकडून भरभरून कौतुक होत आहे.
