बारामती, (पुणे): वडगाव निंबाळकर पोलीस ठाण्याच्या हद्दीत ऑनलाइन रमी खेळण्याचा नाद लागल्याने 5 तरुणांनी लोणी भापकर, साहेबाचीवाडी व बारामती परिसरातील कृषीपंपाची चोरी केल्याचे पोलिसांच्या तपासात उघडकीस आले आहे. याप्रकरणी वडगाव निंबाळकर पोलीस ठाण्यात मोटार चोरी करणाऱ्या पाच जणांवर व चोरीच्या मोटारी खरेदी करणाऱ्या एकावर अशा 6 जणांवर वडगाव निंबाळकर पोलीस ठाण्यात गुन्हा दाखल करण्यात आला आहे.
ओंकार राजेश आरडे (वय 25), महेश दिलीप भापकर (वय 31), निलेश दत्तात्रय मदने (वय 28), प्रथमेश जालिंदर कांबळे (वय-22, रा. चौघेही लोणी भापकर, ता. बारामती), अमोल लहु कदम (वय 28 रा. जळकेवाडी, ता. बारामती), अशी चोरी करणाऱ्या पाच जणांची नावे आहेत. तर कालिदास शिवाजी भोसले (रा. लोणी भापकर, ता. बारामती) असे खरेदी करणाऱ्या दुकानदाराचे नाव आहे. त्यांच्याकडून पोलिसांनी 3 लाख 16 हजार 700 रुपये किंमतीचे गुन्ह्यातील तब्बल 18 ते 20 पंप हस्तगत केले आहेत.
पोलिसांनी दिलेल्या माहितीनुसार, वडगाव निंबाळकर पोलीस ठाण्याच्या हद्दीतील लोणी भापकर, साहेबाचीवाडी हद्दीतील शेतकऱ्यांच्या विहिरीतील व बोरमधील पाणबुडी इलेक्ट्रीक कृषीपंप मागील तीन महिन्यांपासून चोरी होत असल्याच्या तक्रारी शेतकऱ्यांनी वडगाव निंबाळकर पोलीस ठाण्यात दिल्या होत्या.
शेतकऱ्यांच्या विहिरीतील तसेच बोरवेलमधील कृषीपंप चोरी होत असल्याने परिसरातील शेतकरी हतबल झाले होते. सदर या चोरीच्या घटनांचा पोलीस तपास करीत असताना पोलिसांनी शोध घेतला असता पच जणांना ताब्यात घेतले. त्यांच्याकडे अधिक चौकशी केली असता त्यांनी लोणी भापकर तसेच साहेबाची वाडी या गावातीलही विहिरीवरील व विंधन विहिरीवरील पाणबुड्या वीज पंप चोरले असल्याची कबुली दिली. तसेच चोरीच्या मोटारी या कालीदास भोसले यास विकल्याची कबुली दिली.
दरम्यान, भोसले याच्याकडे तपास केला असता त्याने मोटारी खरेदी केल्याची कबुली दिली. या अटक सत्रातून 17 गुन्हे उघड झाले आहेत. आरोपींकडून अधिक मोटार चोरीचे गुन्हे उघडकीस येण्याची शक्यता पोलिसांनी वर्तवली आहे. परिसरातील नागरिक तसेच शेतकऱ्यांकडून पोलिसांनी केलेल्या कामगिरीचे कौतु केले.
सदरची कामगिरी वडगाव निंबाळकर पोलीस ठाण्याचे सहाय्यक निरीक्षक सचिन काळे यांच्या मार्गदर्शनाखाली फौजदार राहुल साबळे, दिलीप सुतार, हवालदार अनिल खेडकर तौफिक मणेरी, महेश पन्हाळे, सूर्यकांत कुलकर्णी, भाऊसाहेब मारकड, सहाय्यक फौजदार बाळासाहेब कारंडे, सुनील बालगुडे हवालदार हृदयनाथ देवकर, पोपट नाळे, सागर चौधरी, आबा जाधव, सुरज धोत्रे, विजय शेंडकर, शाहूराज भोसले, नागनाथ परगे, विलास ओमासे, धनंजय भोसले, राजेंद्र सावंत, सोमनाथ ढाणे, भानुदास सरक, विकास ईटाळे, अरुण सोनवणे यांच्या पथकाने केली.आहे.
