पोपट पाचंगे
रांजणगाव गणपती: पुणे-अहिल्यानगर महामार्गावरील रांजणगाव गणपती व कारेगाव, ता.शिरुर येथील वाहतुकीला अडथळा (Encroachments in Ranjangaon and Karegaon) ठरणारी व अतिक्रमण केलेल्या टपऱ्या, छोटी दुकाने, दुकानांच्या पाट्या व नावाचे फलक काढून टाकत प्रशासनाने संयुक्त कारवाई केली. प्रशासनाच्या या कारवाईचे सर्वसामान्य नागरिकांनी कौतुक केले असून, यामुळे स्थानिक नागरिक व वाहनचालकांनी मोकळा श्वास घेतला आहे.
रांजणगाव येथील अष्टविनायक महागणपती मंदिर मार्ग व महामार्गाच्या दोन्ही बाजूला वाहतुकीस अडथळा ठरणाऱ्या पायऱ्या, ओटे, टपऱ्या व छोटे व्यावसायिक यांनी केलेली अतिक्रमणे, दुकानाच्या पाट्या व नावाचे फलक जेसीबीच्या सहाय्याने काढून टाकत कारवाई करण्यात आली. तर कारेगाव येथे रांजणगाव एमआयडीसीचे प्रवेशद्वार समजल्या जाणाऱ्या यश इन चौकाच्या दोन्ही बाजूकडील अतिक्रमण केलेली छोटी-मोठी दुकाने, व्यवसायाच्या नावाचे फलक ओटे, पायऱ्या व टपऱ्या आणि पदाधिकाऱ्यांच्या नावाचे फलक जेसीबीच्या सहाय्याने नेस्तनाबूत करण्यात आले.
यामुळे कोंडलेल्या महामार्गाने मोकळा श्वास घेतल्याचे चित्र पहावयास मिळाले. या कारवाईत दोन जेसीबी, एक ट्रॅक्टर व ग्रामपंचायत कर्मचारी सहभागी झाले होते.
या कारवाई दरम्यान संबंधित विभागाच्या अधिकाऱ्यांनी या दुकानदारांना सूचना देत पुन्हा अतिक्रमण न करण्याच्या सूचना दिल्या. तसेच नियमांचे उल्लंघन केल्यास दंडात्मक कारवाई करण्यात येणार असल्याचे महाराष्ट्र रस्ते विकास महामंडळाचे ओमप्रकाश निला यांनी यावेळी सांगितले.
या कारवाईप्रसंगी रांजणगाव येथे रस्ते विकास महामंडळाचे ओमप्रकाश निला यांच्यासह रांजणगावचे उपसरपंच श्रीकांत पाचुंदकर, पोलीस निरीक्षक महादेव वाघमोडे, कामगार तलाठी बी.आर.नरवडे, ग्रामपंचायत सदस्य अनिल दूंडे, निलेश लांडे, नेताजी फंड यांसह ग्रामपंचायत पदाधिकारी व ग्रामस्थ तर कारेगाव येथे रस्ते विकास महामंडळाचे ओमप्रकाश निला, पोलीस निरीक्षक महादेव वाघमोडे, ग्रामपंचायत अधिकारी के.बी.बिबे,नूतन उपसरपंच नागेश शेलार, संदीप नवले, युवा उद्योजक शुभम नवले, संदीप गवारे, कामगार तलाठी दीपक गांगर्डे यांसह ग्रामपंचायत कर्मचारी व ग्रामस्थ उपस्थित होते.
महाराष्ट्र रस्ते विकास महामंडळ व संबंधित विभाग यांनी संयुक्त केलेल्या कारवाईवेळी रांजणगाव पोलिसांच्या वतीने चोख पोलीस बंदोबस्त ठेवण्यात आला होता.
दरम्यान, अतिक्रमण हटविलेल्या धडाकेबाज कारवाईचे स्थानिक नागरिक व वाहनचालकांनी स्वागत केले असून, यामुळे कारेगाव व रांजणगाव गणपती येथे दररोज होणारी वाहतूक कोंडी कमी होऊन वाहतूक सुरळीत होण्यास मदत होणार असल्याचे रांजणगावचे पोलीस निरीक्षक महादेव वाघमोडे यांनी सांगितले.
