लोणी काळभोर, ता. 28 : पुणे-सोलापूर महामार्गावर कदमवाकवस्ती (ता. हवेली) ग्रामपंचायत हद्दीतील जुडीओ समोर पंपासमोर दुचाकी आणि बल्कर टँकर यांच्यात झालेल्या भीषण अपघातात एमआयटीमधील एका विद्यार्थ्याचा जागीच मृत्यू, तर त्याच्यासोबत असलेला दुसरा विद्यार्थी गंभीर जखमी झाला. सोमवारी (ता. 28) सायंकाळी पावणेपाचच्या सुमारास हा अपघात झाला.
मिळालेल्या प्राथमिक माहितीनुसार, दोन्ही विद्यार्थी दुचाकीवरून प्रवास करीत असताना जुडीओ समोर त्यांच्या दुचाकीची बल्कर टँकरला धडक झाली. या अपघातात एका विद्यार्थ्याचा घटनास्थळीच मृत्यू झाला, तर दुसऱ्या विद्यार्थ्याला गंभीर दुखापत झाली. जखमी विद्यार्थ्याला उपचारासाठी तातडीने रुग्णालयात दाखल करण्यात आले आहे.
अपघाताची माहिती मिळताच परिसरातील नागरिकांनी घटनास्थळी मोठी गर्दी केली. त्यामुळे महामार्गावरील वाहतुकीवर काही काळ परिणाम झाला. लोणी काळभोर पोलिसांनी घटनास्थळी धाव घेत परिस्थिती नियंत्रणात आणली.
View this post on Instagram
दरम्यान, मृत विद्यार्थी व जखमी विद्यार्थ्याची ओळख पटविण्याचे काम सुरू असून, अपघात नेमका कोणत्या कारणामुळे झाला, याबाबत अद्याप स्पष्ट माहिती मिळालेली नाही. याप्रकरणी लोणी काळभोर पोलीस अधिक तपास करीत आहेत.
