दौंड, (पुणे) : दौंड शहरातील नगरमोरी चौकात धारदार तलवार बाळगून दहशत माजवणाऱ्या तरुणाला दौंड पोलिसांनी हत्यारासह ताब्यात घेतले आहे. तुषार दत्तात्रय जावरे (वय-२०, रा. सिद्धार्थनगर, दौंड) असं ताब्यात घेतलेल्या तरुणाचे नाव आहे. याप्रकरणी दौंड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, दौंड पोलीस ठाण्याचे वरिष्ठ पोलीस निरीक्षक संतोष डोके यांना मंगळवारी (ता. २६) बातमीदारामार्फत बातमी मिळाली की, दौंड शहरात नगरमोरी चौकात एक इसम धारदार तलवार बाळगून शहरात आणि परिसरात दहशत निर्माण करत आहे.
या प्रकारची माहिती मिळताच पोलिस निरीक्षक डोके यांनी दौंड पोलीस स्टेशन येथील गुन्हे शोध पथकला आदेश दिले. त्यानुसार गुन्हे शोध पथक सदर ठिकाणी पोहचले. यावेळी दहशत पसरवणाऱ्या तरुणाला धारदार तलवारीसह पोलिसांनी ताब्यात घेतले. त्याच्याविरोधात दौंड पोलीस ठाण्यात भारतीय हत्यार कायदा कलम 4(25) प्रमाणे गुन्हा दाखल करण्यात आला असून पुढील तपास पोलिस नाईक अमीर शेख हे करीत आहेत.
