विशाल शिंदे
भोर: भोर (Bhor Suicide News) तालुक्यातील सारोळा गावात आज पहाटे घडलेल्या एका हृदयद्रावक घटनेने परिसरात खळबळ उडाली आहे. इरशाद इमाम शेख (वय 40, रा. पांडे, ता. भोर, जि. पुणे) या तरुणाने मानसिक, आर्थिक आणि शारीरिक त्रासाला कंटाळून जामा मशिदीत गळफास घेऊन आत्महत्या केल्याची माहिती समोर आली आहे.
मिळालेल्या माहितीनुसार, गुरुवारी (9 ऑक्टोबर 2025) पहाटे अंदाजे 3.30 ते सकाळी 6 वाजेच्या दरम्यान ही घटना घडली. इरशाद शेख यांनी गावातील जामा मशिदीतील छताच्या पंख्याला दोरीच्या साहाय्याने गळफास घेतला. सकाळी गावकऱ्यांना ही घटना लक्षात आल्यानंतर एकच खळबळ उडाली. त्यानंतर सदर घटनेची माहिती तत्काळ पोलिसांना कळविण्यात आली.
या प्रकरणात फिर्यादी असिब इमाम शेख (वय 38, रा. ग्रीन ग्लोरी सोसायटी, केशवनगर, वडगाव मावळ, जि. पुणे) यांनी राजगड पोलिसांकडे फिर्याद दाखल केली आहे. फिर्यादीनुसार, इरशाद शेख यांना काही व्यक्तींनी गेल्या काही दिवसांपासून मानसिक, शारीरिक आणि आर्थिक त्रास दिला होता. सततच्या त्रासामुळे त्यांचा आत्मविश्वास खच्ची झाला आणि त्यांनी आत्महत्येचा टोकाचा निर्णय घेतला.
फिर्यादीनुसार, या प्रकरणात पुजा माने, तिचा भाऊ, मामा सुशांत विजय करंजकर, ओंकार भोसले आणि इतर अनोळखी 30 ते 40 व्यक्तींविरुद्ध गुन्हा दाखल करण्यात आला आहे. या सर्वांनी एकत्र येऊन इरशाद यांना विविध प्रकारे छळ केल्याचा आरोप करण्यात आला आहे.
घटनेची माहिती मिळताच राजगड पोलिसांनी घटनास्थळी धाव घेऊन पंचनामा केला. मृतदेह ताब्यात घेऊन तो शवविच्छेदनासाठी पाठविण्यात आला आहे. प्राथमिक तपासात आत्महत्येमागील कारणीभूत कारणे वैयक्तिक वाद व मानसिक त्रास असल्याचे दिसून येत आहे.
या घटनेमुळे सारोळा परिसरात शोककळा पसरली आहे. स्थानिक ग्रामस्थांनी या घटनेबद्दल तीव्र दुःख व्यक्त केले असून, मृत इरशाद यांच्या कुटुंबावर शोककळा पसरली आहे.
या घटनेचा पुढील तपास राजगड पोलीस स्टेशन करत आहे.
