मुंबई : माणिकराव कोकाटे रम्मी व्हिडीओ प्रकरणात शरद पवार गटाचे आमदार रोहित पवार यांची चौकशी होण्याची शक्यता आहे. नाशिकच्या कोर्टाने या संपूर्ण प्रकरणाच्या चौकशीचे आदेश दिले आहेत. माजी कृषिमंत्री आणि सध्याचे क्रीडामंत्री माणिकराव कोकाटे यांचा विधान परिषदेत मोबाईलवर रम्मी खेळतानाचा एक व्हिडिओ सोशल मीडियावर व्हायरल झाला होता. यानंतर आमदार रोहित पवार यांनी हा व्हिडिओ आपल्या सोशल मीडियावर शेअर करत कोकाटे यांच्या राजीनाम्याची मागणी केली होती आणि त्यांच्यावर जोरदार टीका देखील केली होती.
या व्हिडिओमुळे आपली बदनामी झाल्याचा दावा करत माणिकराव कोकाटे यांनी आमदार रोहित पवार यांच्या विरोधात नाशिक न्यायालयात अब्रूनुकसानीचा दावा दाखल केला आहे. या प्रकरणावर नुकतीच सुनावणी झाली, यावेळी कोकाटे यांनी न्यायालयात आपला जबाब नोंदवला. माणिकराव कोकाटे यांचा जबाब नोंदवल्यानंतर न्यायालयाने या प्रकरणाची सखोल चौकशी करण्याचे आदेश दिले आहेत.
या आदेशानुसार, विधीमंडळात कोकाटेंचा व्हिडिओ कोणी काढला आणि तो रोहित पवारांपर्यंत कसा पोहोचला याचा तपास पोलीस करणार आहेत.
चौकशी झाल्यानंतर पोलिसांना याबाबतचा अहवाल न्यायालयात सादर करावा लागणार आहे. कोर्टाच्या या आदेशामुळे या प्रकरणाला आता वेगळे वळणं आले असून, रोहित पवार यांची चौकशी होऊ शकते.
कोकाटे यांनी न्यायालयात म्हंटले आहे की, ‘रम्मी खेळतानाचा तो व्हिडिओ मॉर्फ केलेला असून, त्यांना रम्मी खेळता येत नाही. तसेच, रोहित पवार विधान परिषदेचे सदस्य नसतानाही त्यांना हा व्हिडिओ कसा मिळाला, असा प्रश्नही त्यांनी उपस्थित केला. यानंतर त्यांनी या प्रकरणामुळे आपली बदनामी झाल्याने रोहित पवार यांनी माफी मागावी, अशी मागणीही केली आहे.
