पुणे: पुणे शहरात राष्ट्रवादी काँग्रेस (शरद पवार गट) पक्षाचे आमदार बापूसाहेब (MLA Bapusaheb Pathare) पठारे यांच्यावर झालेल्या धक्काबुक्की (Pune News) प्रकरणाला नवे वळण मिळाले आहे. आता या प्रकरणात स्वतः आमदार पठारे यांच्यासह एकूण 8 जणांविरोधात विमानतळ पोलीस ठाण्यात गुन्हा दाखल करण्यात आला आहे.
ही फिर्याद बंडू शहाजी खांदवे (राष्ट्रवादी काँग्रेस – अजित पवार गट, रा. लोहगाव) यांनी दाखल केली आहे. त्यांच्या तक्रारीवरून पोलिसांनी कारवाई करत गुन्हा नोंदवला आहे. या प्रकरणात आमदार बापूसाहेब पठारे यांच्यासह शकील शेख, महेंद्र पठारे, सुरेंद्र पठारे, रविंद्र पठारे, किरण पठारे, सागर पठारे, सचिन पठारे आणि रुपेश मोरे या आठ जणांची नावे आरोपी म्हणून समोर आली आहेत.
अलीकडेच लोहगाव येथे झालेल्या कार्यक्रमादरम्यान आमदार पठारे यांना काही लोकांनी धक्काबुक्की केल्याची घटना घडली होती. या घटनेनंतर परिसरात तणावाचे वातावरण निर्माण झाले होते. मात्र या तणावपूर्ण वातावरणानंतर आता या घटनेच्या तक्रारीवरून गुन्हा दाखल झाल्याने प्रकरणाला नवे राजकीय वळण लागले आहे.
या संपूर्ण घडामोडीमुळे राष्ट्रवादी काँग्रेसच्या दोन्ही गटांतील अंतर्गत संघर्ष उघडकीस येत असल्याची चर्चा राजकीय वर्तुळात सुरू झाली आहे. पोलिसांनी याप्रकरणी तपास सुरू केला असून संबंधित आरोपींविरोधात पुढील कायदेशीर कारवाई केली जाणार असल्याची माहिती मिळत आहे.
