चाकण, (पुणे) : शिक्रापूर-चाकण रोडवर ओव्हरटेक करत असताना ट्रकची एका दुचाकीला धडक बसून अपघात झाला. या अपघातात दुचाकीवरील तरुणाचा जागीच मृत्यू झाला. ही घटना सोमवारी (ता.15) सकाळी साडेनऊ वाजण्याच्या सुमारास मोहितेवाडी (ता.खेड) ग्रामपंचायत हद्दीत घडली. याप्रकरणी ट्रक चालकाला चाकण पोलिसांनी ताब्यात घेतले असून, त्याच्यावर गुन्हा दाखल केला आहे.
नवसाद अहमद कमरुद्दीन अन्सारी असे मृत्यू झालेल्या व्यक्तीचे नाव आहे. तर ट्रकचालक हसनखान सुभान खान पठाण (वय 31, रा. मादनी डोणगाव, ता. मेहकर) असे गुन्हा दाखल करून अटक करण्यात आलेल्या ट्रकचालकाचे नाव आहे. याप्रकरणी मोहम्मद अरफीन अन्सारी (वय 18, रा. मुंबई) यांनी चाकण पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी अन्सारी आणि त्यांचे मामा नौसाद हे दुचाकीवरून चाकण शिक्रापूर रोडने जात होते. मोहितेवाडी येथे आल्यानंतर आरोपी पठाण याने त्याच्या ताब्यातील ट्रकने अन्सारी यांच्या दुचाकीला ओव्हरटेक करण्याचा प्रयत्न करताना ट्रकची दुचाकीला जोरदार धडक बसली.
दरम्यान, या अपघातात नौसाद यांचा जागीच मृत्यू झाला तर फिर्यादी अन्सारी हे जखमी झाले. याप्रकरणी ट्रकचालकाला अटक करून चाकण पोलीस पुढील तपास करत आहेत.
