पुणे: मोबाईलवर आलेल्या एका साध्या मेसेजवर विश्वास ठेवणे बिबवेवाडीतील 56 वर्षीय महिलेला चांगलेच महागात पडले. ‘गॅस कनेक्शन अपडेट करा’ असा संदेश व्हॉट्सॲपवर आल्यानंतर महिलेने त्यावर विश्वास ठेवून पुढील प्रक्रिया केली. मात्र, काही वेळातच त्यांच्या बँक खात्यातून तब्बल 9 लाख 66 हजार 315 रुपये परस्पर वळवण्यात आले.
बिबवेवाडी परिसरात राहणाऱ्या तक्रारदार मेदनकर यांच्या व्हॉट्सॲपवर एका अज्ञात व्यक्तीने संपर्क साधला. गॅस कनेक्शन अपडेट न केल्यास सेवा बंद होऊ शकते, असे भासवून त्याने महिलेला एक APK फाइल पाठवली. गॅस सेवा बंद होण्याच्या भीतीने महिलेने ती फाइल मोबाईलमध्ये डाउनलोड केली.
फाइल डाउनलोड केल्यानंतर आरोपीने सांगितलेल्या पद्धतीने महिलेने प्रक्रिया पूर्ण केली. याच दरम्यान सायबर चोरट्याने त्यांच्या मोबाईलमधील संवेदनशील माहिती मिळवल्याचा आरोप आहे. तसेच मोबाईलचा ताबा मिळवल्यानंतर वेगवेगळे ऑनलाइन व्यवहार करून त्यांच्या खात्यातील मोठी रक्कम दुसऱ्या खात्यांमध्ये वळवण्यात आली.
बँक खात्यातून पैसे कमी झाल्याचे लक्षात येताच महिलेच्या लक्षात संपूर्ण प्रकार आला. त्यानंतर त्यांनी तातडीने बिबवेवाडी पोलीस ठाण्यात धाव घेत तक्रार दाखल केली. या प्रकरणी पोलिसांनी अज्ञात व्यक्तींविरोधात सायबर फसवणुकीचा गुन्हा नोंदवला आहे. पोलीस निरीक्षक (गुन्हे) सूरज बेंद्रे या प्रकरणाचा तपास करत आहेत.
