आदित्य बोराटे
इंदापूर: जगद्गुरू संतश्रेष्ठ संत तुकाराम महाराज पालखी सोहळ्याच्या निमगाव केतकी येथील मुक्कामादरम्यान वारकऱ्यांच्या सेवेसाठी श्री शिवशंभू चॅरिटेबल ट्रस्ट आणि शिवसेनेच्या वतीने मोफत औषध व पिण्याच्या पाण्याच्या बाटल्यांचे वाटप करण्यात आले. गेल्या दहा वर्षांपासून सातत्याने राबविण्यात येणाऱ्या या उपक्रमाला वारकऱ्यांचा उत्स्फूर्त प्रतिसाद लाभला.
महाराष्ट्रातील सर्वसामान्यांना आरोग्यसेवा उपलब्ध व्हावी, या उद्देशाने उपमुख्यमंत्री एकनाथ शिंदे, खासदार डॉ. श्रीकांत शिंदे तसेच मुख्यमंत्री वैद्यकीय सहायता कक्षाशी संबंधित मंगेश चिवटे यांच्या मार्गदर्शनाखाली हा उपक्रम पार पडला. यावेळी हजारो वारकऱ्यांनी मोफत औषधांचा लाभ घेतला, तर पाच हजारांहून अधिक पाण्याच्या बाटल्यांचे वितरण करण्यात आले.
या उपक्रमाचे आयोजन शिवसेना सोशल मीडियाचे पश्चिम महाराष्ट्र उपसमन्वयक तथा शिवसेना वैद्यकीय कोअर कमिटी सदस्य भूषण सुर्वे आणि शिवसेना वैद्यकीय मदत कक्षाचे पुणे जिल्हा प्रमुख विशाल धुमाळ यांच्या मार्गदर्शनाखाली करण्यात आले.
यावेळी शिवसेना सोशल मीडिया इंदापूर शहरप्रमुख सागर आवटे, पुणे जिल्हा सोशल मीडिया प्रमुख अवधूत पाटील, शिवसेना इंदापूर शहरप्रमुख ॲड. आनंद केकाण, शिवशंभू चॅरिटेबल ट्रस्टचे कार्याध्यक्ष अनिकेत ढवळे, राहुल ढवळे यांच्यासह पदाधिकारी व स्वयंसेवकांनी वारकऱ्यांना औषधांचे वितरण करून सेवा बजावली.
दरम्यान, उपमुख्यमंत्री वैद्यकीय सहायता कक्षाचे कक्षप्रमुख तथा उपमुख्यमंत्री एकनाथ शिंदे यांचे विशेष कार्याधिकारी मंगेश चिवटे यांच्या माध्यमातून केंद्रीय आरोग्यमंत्री प्रतापराव जाधव यांनी दिल्लीहून व्हिडिओ कॉलद्वारे उपक्रमाची माहिती घेत आयोजकांचे कौतुक केले. वारकऱ्यांच्या सेवेसाठी सातत्याने राबविण्यात येणाऱ्या या उपक्रमाबद्दल उपस्थितांनी समाधान व्यक्त केले.
