लोणी काळभोर, ता. १९ : लोणी काळभोर (ता. हवेली) येथील तोरणा खानावळसमोर शनिवारी (ता.18) रात्री जुन्या वादातून दोन गट आमनेसामने आल्याने परिसरात काही काळ तणावाचे वातावरण निर्माण झाले. सार्वजनिक रस्त्यावरच दोन्ही गटांतील सदस्यांनी एकमेकांना शिवीगाळ करत आरडाओरडा आणि झोंबाझोंबी सुरू केल्याने नागरिकांमध्ये भीतीचे वातावरण पसरले. घटनेची माहिती मिळताच लोणी काळभोर पोलिसांनी तातडीने घटनास्थळी धाव घेत परिस्थिती नियंत्रणात आणत ११ जणांना ताब्यात घेत त्यांच्याविरोधात गुन्हा दाखल केला.
सुरज शांताराम भोंडवे (वय 24), लक्ष्मण गजानन भोंडवे (वय 24), प्रथमेश संदिप भोंडवे (वय 24), ओंकार भोंडवे (वय-19), बबन भोंडवे (वय 50, वरील पाचह रा आळंदी म्हातोबा ता हवेली जि पुणे), शुभम तावणे (वय 30), संग्राम काळभोर (वय 30 ) प्रथमेश गायकवाड (वय 25) ओंकार गायकवाड (वय 21, वरील चारही रा लोणी काळभोर, पुणे), अमित वाघमारे (वय 25), अक्षय कांबळे (वय 32, दोघेही रा. थेऊर गांव, पुणे) अशी गुन्हा दाखल करण्यात आलेल्यांची नावे आहेत. याप्रकरणी लोणी काळभोर पोलीस ठाण्याचे पोलीस शिपाई किरण गायकवाड यांनी सरकारतर्फे लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, पोलीस शिपाई किरण गायकवाड व त्यांचे सहकारी पोलीस शिपाई मेमाणे हे रात्रीच्या बीट मार्शल ड्युटीवर असताना थेऊर फाटा परिसरात गस्त घालत होते. रात्री सुमारे १० वाजण्याच्या सुमारास लोणी कॉर्नर येथील तोरणा खानावळसमोर मोठी गर्दी झाल्याचे त्यांच्या निदर्शनास आले. संशय आल्याने पोलिसांनी तात्काळ घटनास्थळी धाव घेतली. तेथे पोहोचल्यावर दोन गटांतील सुमारे दहा ते बारा जण एकमेकांना शिवीगाळ करत झोंबाझोंबी करत असल्याचे आढळून आले.
परिस्थिती हाताबाहेर जाण्याची शक्यता लक्षात घेऊन रात्रगस्त अधिकारी पोलीस उपनिरीक्षक योगेश पैठणे यांना तात्काळ माहिती देण्यात आली. त्यांच्या सूचनेनुसार अतिरिक्त पोलीस कर्मचारी घटनास्थळी दाखल झाले आणि सर्वांना वेगळे करून परिस्थिती नियंत्रणात आणण्यात आली.
प्राथमिक चौकशीत संबंधितांनी जुन्या वादावर तोडगा काढण्यासाठी एकत्र आल्याचे सांगितले. मात्र बोलणी सुरू असतानाच वाद पुन्हा उफाळून आला आणि त्याचे रूपांतर सार्वजनिक ठिकाणी गोंधळ, आरडाओरडा आणि झोंबाझोंबीत झाले. त्यामुळे परिसरात मोठी गर्दी जमली होती. या प्रकरणी ११ जणांविरोधात भारतीय नागरिक सुरक्षा संहिता (BNSS) कलम १९४(२) अंतर्गत सार्वजनिक शांततेचा भंग केल्याप्रकरणी गुन्हा दाखल करण्यात आला आहे.
पोलिसांची वेळेवर कारवाई; मोठा अनर्थ टळला
घटनेच्या वेळी पोलिसांनी तातडीने हस्तक्षेप केला नसता, हा वाद आणखी चिघळून गंभीर स्वरूप धारण करण्याची शक्यता होती. पोलिसांच्या तत्परतेमुळे परिस्थिती नियंत्रणात आली आणि कोणतीही मोठी अनुचित घटना घडली नाही. सार्वजनिक रस्त्यावर झालेल्या या गोंधळामुळे लोणी काळभोर परिसरात काही काळ तणाव निर्माण झाला होता. भररस्त्यात झालेल्या या प्रकाराची परिसरात दिवसभर चर्चा सुरू होती. या घटनेचा पुढील तपास लोणी काळभोर पोलीस करत आहेत.
