पुणे: पुणे महानगरपालिकेत कार्यरत असलेल्या एका महिला कर्मचाऱ्याला जनगणनेचे काम करत असताना मारहाण झाल्याची धक्कादायक घटना समोर आली आहे. ही घटना २७ मे रोजी दुपारी ३ ते ४.३० च्या सुमारास मीनाताई ठाकरे वसाहत येथे घडली. या प्रकरणी स्वारगेट पोलीस ठाण्यात गुन्हा दाखल करण्यात आला असून, आरोपींनी केलेल्या या हल्ल्यामुळे परिसरात खळबळ उडाली आहे.
तक्रारदार महिला कर्मचारी जनगणनेच्या कामासाठी या परिसरात गेल्या होत्या. पोलिसांनी दिलेल्या माहितीनुसार, विकास मोरे, क्रांती मोरे, मुक्ता कसबे, अभिजीत मोरे आणि इतर ५ अनोळखी व्यक्तींनी सरकारी कामात अडथळा निर्माण केला. सुरुवातीला या लोकांनी महिला कर्मचाऱ्याला शिवीगाळ केली.
२८ मे रोजी फिर्यादी कर्मचारी पुन्हा त्याच भागात कामासाठी गेल्या असता, त्यांनी मागील दिवशी झालेल्या वादावर चर्चा करून समझोता करण्याचा प्रयत्न केला. मात्र, आधीच्या भांडणाचा राग मनात धरून मोरे कुटुंबीयांनी हल्ला केला. त्यांना दगडाने मारहाण केली आणि लाथा-बुक्क्यांनी गंभीर जखमी केले.
पुणे महानगरपालिकेच्या या कर्मचाऱ्याने दिलेल्या फिर्यादीवरून स्वारगेट पोलिसांनी विविध कलमांन्वये गुन्हा दाखल केला आहे. सरकारी कामात अडथळा आणणे आणि महिला कर्मचाऱ्याला मारहाण करणे हा गंभीर गुन्हा असून, पोलीस आता या प्रकरणाचा पुढील तपास करत आहेत.
