इंदापूर, (पुणे) : अनैतिक संबंधांच्या संशयावरून तरंगवाडी (ता. इंदापूर) येथे एका 54 वर्षीय व्यक्तीचा लोखंडी रॉडने बेदम मारहाण करून अत्यंत निर्घृणपणे खून करण्यात आल्याची घटना शनिवारी (ता. 20) दुपारी घडली आहे. या हल्ल्यात संबंधित व्यक्तीचा जागीच मृत्यू झाला. या हत्याकांडानंतर इंदापूर पोलिसांनी अत्यंत वेगाने तपासाची चक्रे फिरवत मुख्य आरोपीला तात्काळ बेड्या ठोकल्या आहेत. या धक्कादायक घटनेमुळे तरंगवाडी आणि संपूर्ण इंदापूर परिसरात मोठी खळबळ उडाली असून भीतीचे वातावरण निर्माण झाले आहे.
छगन पांडुरंग भिसे (वय-54, रा. तरंगवाडी, ता. इंदापूर, जि. पुणे) असे खून झालेल्या व्यक्तीचे नाव आहे. तर धुळदेव उर्फ देवा तुकाराम माने (रा. खुळेवाडी, ता. माळशिरस, जि. सोलापूर), व अशोक भानुदास टकले (रा. तरंगवाडी, ता. इंदापूर, जि. पुणे) अशी खून करणाऱ्या दोघांची नावे आहेत. यातील मुख्य आरोपी धुळदेव उर्फ देवा तुकाराम माने याला पोलिसांनी तात्काळ अटक केली आहे. याप्रकरणी अमोल भिसे यांनी इंदापूर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शनिवारी दुपारी तरंगवाडी गावातील वाघजाई चौक परिसरात अनैतिक संबंधांच्या जुन्या कारणावरून छगन भिसे आणि आरोपींमध्ये वाद सुरू झाला. हा वाद इतका विकोपाला गेला की, आरोपींनी पूर्वनियोजित संगनमत करून छगन भिसे यांना घेरले. त्याच वेळी आरोपींनी स्वतःजवळील लोखंडी रॉडने छगन भिसे यांच्या डोक्यावर आणि शरीरावर कडक आणि वर्मी प्रहार केले. हा हल्ला इतका भीषण होता की, डोक्याला गंभीर दुखापत झाल्याने छगन भिसे यांचा जागीच रक्ताच्या थारोळ्यात मृत्यू झाला.
या रक्तरंजित घटनेची माहिती मिळताच इंदापूर परिसरात एकच धावपळ उडाली. या घटनेची गांभीर्याने दखल घेत उपविभागीय पोलीस अधिकारी डॉ. सुदर्शन राठोड यांनी तात्काळ गुन्ह्याच्या ठिकाणी धाव घेऊन कडक पाहणी केली आणि तपासाचे आदेश दिले. भरदुपारी गावात खून करून पसार झालेल्या आरोपींचा माग काढण्यासाठी इंदापूर पोलीस स्टेशनचे पोलीस निरीक्षक विलास नाळे यांच्या मार्गदर्शनाखाली पोलिसांनी विशेष पथके रवाना केली होती.
दरम्यान, पोलिसांनी तांत्रिक विश्लेषणाच्या आधारे वेगाने कारवाई करत सोलापूर जिल्ह्यातील माळशिरसचा राहणारा मुख्य आरोपी धुळदेव उर्फ देवा तुकाराम माने याला काही तासांतच कडक बेड्या ठोकल्या. या गुन्ह्यातील दुसरा आरोपी अशोक टकले याचा पोलीस शोध घेत आहेत.
