पुणे: गेल्या काही दिवसांपासून सोने आणि चांदीच्या बाजारात मोठी हालचाल पाहायला मिळत आहे. मौल्यवान धातूंच्या किमतींमध्ये अचानक मोठी वाढ झाली असून, ग्राहकांच्या खिशावर त्याचा परिणाम होण्याची शक्यता आहे. महाराष्ट्रातील महत्त्वाच्या सराफ बाजारांपैकी एक असलेल्या जळगावमध्ये सलग दुसऱ्या दिवशी सोन्या-चांदीच्या दरांनी नवा उच्चांक गाठला आहे.
जळगावच्या सराफ बाजारात अवघ्या 2 दिवसांत सोन्याच्या दरात तब्बल 5,470 रुपयांची वाढ झाली आहे. तर चांदीच्या किमतीत 8,950 रुपयांची मोठी तेजी नोंदवण्यात आली आहे. या विक्रमी वाढीमुळे सराफ व्यावसायिक आणि ग्राहकांमध्ये मोठी चर्चा सुरू झाली आहे.
जळगाव बाजारातील ताज्या दरानुसार, सोन्याच्या किमतीत एका दिवसात 2,970 रुपयांची वाढ झाली असून, जीएसटीसह सोन्याचा भाव प्रति 10 ग्रॅम 1,52,409 रुपयांवर पोहोचला आहे. तर चांदीच्या दरात 1,950 रुपयांची वाढ होऊन जीएसटीसह चांदीचा भाव प्रति किलो 2,36,848 रुपयांवर गेला आहे.
दरम्यान, मल्टि कमोडिटी एक्सचेंज (MCX) वरही सोने आणि चांदीच्या दरात मोठी तेजी पाहायला मिळाली. गेल्या 48 तासांत सोन्याचा भाव प्रति 10 ग्रॅम तब्बल 5,750 रुपयांनी वाढला आहे. सोमवारी रात्री 1,42,900 रुपयांवर असलेले सोने बुधवारी रात्री 1,48,650 रुपयांवर होते.
चांदीच्या दरातही मोठी वाढ झाली असून, MCX वर चांदीने प्रति किलो 11,084 रुपयांची झेप घेतली आहे. सोमवारी 2,16,506 रुपये असलेली चांदी बुधवारी रात्री 2,27,490 रुपयांवर पोहोचली.
सराफ व्यावसायिकांच्या मते, जागतिक पातळीवरील वाढता तणाव, अमेरिकेच्या फेडरल रिझर्व्हकडून व्याजदर कपातीची शक्यता आणि जगभरातील केंद्रीय बँकांकडून सोन्याची मोठ्या प्रमाणावर होत असलेली खरेदी यामुळे सोन्या-चांदीच्या किमती वाढत आहेत.
आंतरराष्ट्रीय बाजारातील घडामोडींमुळे पुढील काळातही मौल्यवान धातूंच्या दरात चढ-उतार कायम राहण्याची शक्यता व्यापाऱ्यांकडून व्यक्त केली जात आहे.
