पुणे : पुण्यातील धायरी (Pune Crime) गावात कोयता घेऊन (Pune News) दहशत माजवणाऱ्या तीन तरुणांना पोलिसांनी अटक करून त्यांची वरात काढल्याची घटना घडली आहे. आरोपींनी सार्वजनिक ठिकाणी हत्यारांचा धाक दाखवून नागरिकांमध्ये भीती निर्माण केली होती. या घटनेमुळे परिसरात एकच खळबळ उडाली असून पोलिसांनी तात्काळ कारवाई करून आरोपींना पकडले आहे.
अटक करण्यात आलेल्यांमध्ये प्रथमेश देविदास बनसोडे (वय 23), आभिद महेश गुरव (वय 25) आणि आदेश बाळू वाळके (वय 22) या तिघांचा समावेश आहे. हे तिन्ही आरोपी धायरी गावातील असून, स्थानिक नागरिकांच्या तक्रारीनंतर नांदेड सिटी पोलीस ठाण्याने त्यांच्या विरोधात गुन्हा नोंदवला आहे.
मिळालेल्या माहितीनुसार, धायरी येथील पवळी चौकात आरोपींपैकी एकाने कारच्या बोनेटवर चढून हातात कोयता घेतला आणि जाणाऱ्या-येणाऱ्या नागरिकांना धमकावले. त्याच्यासोबत असलेल्या दोन साथीदारांनीही शिवीगाळ करत गोंधळ घातला. या प्रकारामुळे नागरिकांमध्ये भीतीचं वातावरण निर्माण झालं. उपस्थितांनी तत्काळ पोलिसांना कळवले आणि नांदेड सिटी पोलिसांनी त्वरित घटनास्थळी पोहोचून तपास सुरू केला.
प्राथमिक तपासात या तरुणांनी समाजमाध्यमांवर लोकप्रियता मिळवण्यासाठी आणि गँगस्टर स्टाइल दाखवण्यासाठी हा प्रकार केल्याचं समोर आलं आहे. त्यांनी आपली दहशत दाखवण्यासाठी कोयता हातात घेऊन व्हिडिओ तयार केला आणि तो सोशल मीडियावर टाकण्याचा प्रयत्न केला होता. मात्र, पोलिसांनी वेळेवर हस्तक्षेप करून त्यांना अटक केली.
पोलिसांनी आरोपींना ताब्यात घेतल्यानंतर त्यांना त्या ठिकाणी घेऊन जाऊन त्यांची वरात काढली, जेणेकरून अशा प्रकारच्या गुन्हेगारी प्रवृत्तीला आळा बसावा. पोलिसांनी आरोपींना गावातील रस्त्यांवरून फिरवत नागरिकांना दाखवले की कायद्याच्या विरोधात वागणाऱ्यांना शिक्षा नक्कीच मिळते.
या कारवाईनंतर पोलिसांनी परिसरात गस्त वाढवली असून अशा प्रकारचे प्रकार पुन्हा घडू नयेत, यासाठी विशेष लक्ष ठेवले जात आहे. पोलिसांच्या या कारवाईचं नागरिकांनी स्वागत केलं असून, समाजात कायद्याचा धाक बसावा यासाठी पोलिसांचे हे पाऊल योग्य दिशेने असल्याचं मत व्यक्त करण्यात येत आहे. सध्या पोलिस उपनिरीक्षकांच्या मार्गदर्शनाखाली पुढील तपास सुरू आहे.
