पुणे : पूजा सांगणारा (Pune Crime) आणि सायंकाळनंतर मुलांचे क्लास घेणारा एका पुजाऱ्याने आपल्या क्लासला येणाऱ्या 14 वर्षांच्या अल्पवयीन मुलीवर वारंवार अत्याचार (Pune News) केल्याची धक्कादायक घटना उघडकीस आली होती. या प्रकरणात न्यायालयाने आरोपी पुजाऱ्याला 20 वर्षे सक्तमजुरीची शिक्षा सुनावली आहे.
संजय रमेश शर्मा (वय 56, रा. राधिका एम्पायर, जगतापनगर, वानवडी) असे या नराधम पुजाऱ्याचे नाव आहे. ही घटना 3 ऑगस्ट 2021 ते 29 ऑक्टोबर 2021 या कालावधीत त्याच्या घरी घडली होती. दिवसभर पुजारी म्हणून काम करणारा संजय शर्मा सायंकाळी मुलांचे क्लास घेत असे. या क्लासला जाणाऱ्या अल्पवयीन मुलीला त्याने बेडरुममध्ये घेऊन जाऊन वारंवार अत्याचार केला. इतकेच नव्हे, तर मुलीला आणि तिच्या बहिणीला जीवे मारण्याची धमकी देत तो कृत्य लपवण्याचा प्रयत्न करीत होता.
पीडित मुलीने ही बाब आईला सांगितल्यानंतर त्यांनी वानवडी पोलीस ठाण्यात तक्रार दाखल केली. पोलीस उपनिरीक्षक सुधा चौधरी यांनी तपास करून न्यायालयात दोषारोपपत्र दाखल केले. या खटल्यात सरकारी वकील नितीन कोंघे यांनी सरकारी बाजू मांडली. त्यांनी पीडित, तपास अधिकारी आणि वैद्यकीय अधिकाऱ्यांच्या साक्षी महत्त्वाच्या ठरल्याचे सांगितले. आरोपीने स्वत:च्या बचावासाठी स्वत:सह त्याची बहीण, मुलगा आणि सोसायटीतील एका रहिवाश्याच्या साक्षी मांडल्या होत्या.
जिल्हा व सत्र न्यायालयाचे विशेष न्यायाधीश शिरभाते यांनी आरोपी संजय रमेश शर्मा याला पोस्को कायद्यांतर्गत 20 वर्षे सक्तमजुरीची शिक्षा सुनावली. तसेच 37 हजार रुपयांचा दंड ठोठावला असून दंड न भरल्यास 9 महिने अतिरिक्त सक्तमजुरी भोगावी लागेल, असेही आदेश न्यायालयाने दिले.
या खटल्यामध्ये पोलीस उपायुक्त डॉ. राजकुमार शिंदे यांनी पर्यवेक्षण केले. वानवडी पोलीस ठाण्याचे वरिष्ठ पोलीस निरीक्षक विजयराव डोके यांनी प्रभारी अधिकारी म्हणून काम पाहिले. तर कोर्ट पैरवी अधिकारी म्हणून दिनेश जाधव यांनी जबाबदारी पार पाडली.
