घोडेगाव: घोडेगाव पोलीसांनी (Pune Crime) मोटार सायकल (Pune News) चोराच्या मुसक्या आवळुन नाशिक येथुन चोरीची मोटार सायकल हस्तगत केली आहे. याप्रकरणी शिनोली (ता. आंबेगाव) येथील एका आरोपीला पोलिसांनी अटक केली असून, यामध्ये एका विधीसंघर्षित बालकाचा समावेश आहे. बालकाकडे प्राथमिक तपास करून त्याला त्याच्या पालकांच्या ताब्यात देण्यात आले आहे.
गणेश उर्फ बाब्या परशुराम बोऱ्हाडे (रा. शिनोली ता. आंबेगाव जि.पुणे) असे अटक करण्यात आलेल्या आरोपीचे नाव असून त्याच्याकडून 30 हजार रुपयांची चोरी केलेली मोटारसायकल हस्तगत करण्यात आली आहे.
पोलिसांनी दिलेल्या माहितीनुसार, घोडेगाव पोलीस ठाण्याच्या हद्दीतील शिनोली गावात 26 सप्टेंबरला फिर्यादी गुलाम हुसेन युसुफ तांबोळी यांची मोटार सायकल अज्ञात चोरट्यांनी चोरून नेल्याची तक्रार पोलीस ठाण्यात दिली होती. त्यानुसार गुन्हा दाखल करण्यात आला होता. सदरची मोटार सायकल चोरीस गेलेल्या घटनास्थळी घोडेगाव पोलीस ठाण्याचे अधिकारी व अंमलदार यांच्या तपास पथकाने भेट देवुन परीसरातील सीसीटीव्ही फुटेजची पडताळणी तसेच तांत्रिक विश्लेषण करून स्थानिक नागरिकांकडून माहिती घेवुन तपास सुरू केला होता.
सदर गुन्ह्याच्या तपासादरम्यान पोलीस अंमलदार अक्षय वायदंडे यांना गोपनीय बातमीदाराकडुन सदर आरोपीची माहिती प्राप्त झाली होती. त्या माहितीचे अनुषंगाने तपास पथकाने मंचर, पारगाव, खेड, नाशिक येथे तपास करून आरोपी गणेश उर्फ बाब्या बोऱ्हाडे याला ताब्यात घेवुन त्याने चोरी केलेली 30 हजार रुपयांची मोटारसायकल नाशिक येथुन हस्तगत करण्यात आली आहे.
दरम्यान, सदरचा गुन्हा नमुद आरोपी याच्यासह विधिसंघर्षित बालक व आरोपी यांनी मिळुन केलेला असुन विधीसंघर्षित बालकाकडे प्राथमिक तपास करून त्याला त्याच्या पालकांच्या ताब्यात देण्यात आले असल्याची माहिती पोलिसांनी दिली आहे.
ही कारवाई वरिष्ठांच्या मार्गदर्शनाखाली सहाय्यक पोलीस निरीक्षक सागर पवार, पोलीस उपनिरीक्षक महेश पवार, पोलीस अंमलदार रवींद्र सुरकुले, सरला सुरकुले, बाळु सावंत, अक्षय वायदंडे, देविदास कुटे, निलेश तळपे, आशुतोष पानसरे, राम राठोड यांनी केली आहे. तपास पोलीस हवालदार रवींद्र सुरकुले हे करीत आहेत.
