पुणे : पुण्यातील प्रसिद्ध श्रीमंत दगडूशेठ हलवाई गणपती मंदिरासमोर ऋषिपंचमीच्या पावन प्रसंगी दरवर्षीप्रमाणे यंदाही हजारो महिलांच्या उपस्थितीत भव्य सामूहिक अथर्वशीर्ष पठण सोहळा पार पडणार आहे. 15 सप्टेंबर 2026 रोजी पार पडणाऱ्या या सोहळ्यासाठी मोठ्या संख्येने भाविक महिला एकत्र येणार आहेत. या पार्श्वभूमीवर पुणे शहर वाहतूक पोलिसांनी सकाळी 5 वाजेपासून कार्यक्रम संपेपर्यंत (अंदाजे सकाळी 8 ते 9 वाजेपर्यंत) मध्य पुण्यातील वाहतुकीमध्ये महत्त्वपूर्ण बदल केले आहेत.
बंद राहणारे प्रमुख रस्ते
1. छत्रपती शिवाजी महाराज रस्ता: जिजामाता चौक ते मंडईतील रामेश्वर मंदिर चौक या दरम्यानचा मार्ग सर्व प्रकारच्या वाहनांसाठी पूर्णपणे बंद ठेवण्यात येईल.
2. अप्पा बळवंत चौक ते बुधवार चौक: या मार्गावरील सर्व वाहतूक पूर्णपणे रोखली जाईल.
3. लक्ष्मी रस्ता: गर्दीचे प्रमाण वाढल्यास सोन्या मारुती चौक आणि विजय मारुती चौक येथून वाहनांचा मार्ग गरजेनुसार वळवण्यात येईल.
नागरिकांसाठी पर्यायी मार्ग
स्वारगेटकडे जाणाऱ्यांसाठी: गाडगीळ पुतळा किंवा जिजामाता चौकातून डावीकडे वळून गणेश रस्ता मार्गे फडके हौद चौक ➡️ देवजीबाबा चौक ➡️ हमजेखान चौक ➡️ महाराणा प्रताप रस्ता ➡️ गोविंद हलवाई चौक ➡️ गोटीराम भैय्या चौक आणि पुढे शिवाजी रस्त्याने स्वारगेटच्या दिशेने जाता येईल.
अप्पा बळवंत चौकातून पुढे प्रवास करणाऱ्यांसाठी: वाहनचालक बाजीराव रस्ता ➡️ फुटका बुरुज ➡️ गाडगीळ पुतळा चौक ➡️ जिजामाता चौक या मार्गाचा अवलंब करू शकतात.
सोन्या मारुती चौकातून प्रवास करणाऱ्यांसाठी: या चौकातून डावीकडे वळून मिर्झा गालिब रस्ता जंक्शन ➡️उजवीकडे मंडई ➡️ शिवाजी रस्ता मार्गे स्वारगेटकडे जाता येईल.
कार्यक्रम वेळेत व सुरळीत पार पाडण्यासाठी आणि वाहतूक कोंडी टाळण्यासाठी नागरिकांनी व वाहनचालकांनी सहकार्य करून पर्यायी मार्गांचा वापर करावा, असे आवाहन पुणे शहर वाहतूक विभागाकडून करण्यात आले आहे.
