पुणे: कात्रज-कोंढवा रस्त्यावरील सुखसागरनगर परिसरात 18 वर्षीय तरुणीला त्रास देऊन तिला जबरदस्तीने उचलून नेण्याचा प्रयत्न केल्याची घटना समोर आली आहे. शनिवारी सायंकाळी घडलेल्या या प्रकारामुळे परिसरात खळबळ उडाली. तरुणीने आरडाओरड केल्यानंतर तिची मैत्रीण आणि स्थानिक नागरिक मदतीसाठी धावले. नागरिकांनी आरोपीला पकडून पोलिसांच्या ताब्यात दिल्याने पुढील अनर्थ टळला.
या प्रकरणातील आरोपीचे नाव जितु किशोरीलाल सरोज (वय 30, मूळ उत्तर प्रदेश) असे आहे. घटनेचे सीसीटीव्ही फुटेजही समोर आले आहे. सार्वजनिक ठिकाणी तरुणीच्या सुरक्षेचा प्रश्न या घटनेमुळे पुन्हा चर्चेत आला आहे.
पोलिसांनी दिलेल्या माहितीनुसार, संबंधित तरुणी सुखसागरनगरमधील समर्थ डेअरीसमोर मैत्रिणीची वाट पाहत उभी होती. त्यावेळी आरोपी तिच्याजवळ आला. त्याने तरुणीच्या अंगाला हात लावून तिचा शर्ट ओढला आणि तिला उचलून नेण्याचा प्रयत्न केल्याचा आरोप आहे.
तरुणीने मदतीसाठी आवाज दिल्यानंतर तिची मैत्रीण तिथे पोहोचली. तिने आरोपीला बाजूला ढकलले. त्यामुळे तरुणी खाली पडली आणि तिच्या हाताला दुखापत झाली. त्यानंतरही आरोपीने तिला घेऊन जाण्याचा प्रयत्न केल्याचे तरुणीने सांगितले.
आरडाओरड ऐकून परिसरातील नागरिक घटनास्थळी जमा झाले. त्यांनी आरोपीला रोखण्याचा प्रयत्न केला. यावेळी आरोपीने नागरिकांनाही मारण्याचा प्रयत्न केल्याचा आरोप आहे. तसेच एका व्यक्तीचा मोबाईल जमिनीवर फेकून तो फोडल्याची तक्रारही करण्यात आली आहे. भारती विद्यापीठ पोलिसांनी आरोपीला ताब्यात घेतले असून, या प्रकरणाचा पुढील तपास सुरू आहे.
