पुणे: विवाहबाह्य (Pune Crime) संबंधाचा संशय घेऊन पतीने आपल्या पत्नीवर (Pune News) जीवघेणा हल्ला केल्याची धक्कादायक घटना समोर आली आहे. या प्रकरणी दाम्पत्याच्या मुलाने पोलिसांकडे तक्रार दिली असून, जखमी पत्नीवर उपचार सुरू आहेत. आरोपी पतीला पोलिसांनी तातडीने अटक केली आहे.
ही घटना शहराजवळील नगर रस्त्यावरील केसनंद भागात घडली. सुशीला बिराप्पा खांडेकर (वय 45, रा. लाडबा वस्ती, केसनंद) असे गंभीर जखमी झालेल्या महिलेचे नाव असून, तिच्या पतीला बिराप्पा शंकर खांडेकर (वय 50) याला पोलिसांनी अटक केली आहे. या प्रकरणी पीडितेचा मुलगा समर्थ बिराप्पा खांडेकर (वय 22) याने वाघोली पोलिस ठाण्यात फिर्याद दिली आहे.
पोलिसांच्या माहितीनुसार, खांडेकर दाम्पत्य मजुरीचे काम करत होते. गेल्या काही दिवसांपासून पती-पत्नीमध्ये सतत वाद सुरू होते. आरोपी बिराप्पा हा पत्नीच्या चारित्र्यावर संशय घेत होता. त्यामुळे तो वारंवार तिचा छळ करीत असे. सोमवारी झालेल्या वादात त्याचा राग अनावर झाला आणि त्याने पत्नी सुशीलावर काठीने बेदम मारहाण केली.
या हल्ल्यात सुशीलाच्या डोक्याला आणि नाकाला गंभीर दुखापत झाली असून तिला उपचारासाठी तातडीने रुग्णालयात दाखल करण्यात आले आहे. घटनेची माहिती मिळताच पोलिसांनी त्वरीत कारवाई करून आरोपी बिराप्पा याला ताब्यात घेतले.
या प्रकरणी त्याच्याविरोधात खुनाच्या प्रयत्नाचा गुन्हा दाखल करण्यात आला असून पुढील तपास पोलीस उपनिरीक्षक एस. शेंडगे करत आहेत. या घटनेमुळे परिसरात मोठी खळबळ उडाली असून पुन्हा एकदा कौटुंबिक वादातून होणाऱ्या हिंसाचाराचा गंभीर मुद्दा समोर आला आहे.
