पुणे: पुण्यात सोशल मीडियावरील एका स्टेटसवरून दोन मित्रांनी आपल्याच मित्राची हत्या केल्याची धक्कादायक घटना समोर आली आहे. विरोधी राजकीय पक्षाच्या समर्थनार्थ व्हॉट्सॲप स्टेटस का ठेवले, या किरकोळ कारणावरून दोन अल्पवयीन मुलांनी आपल्या मित्राला वेताळ टेकडीवर नेऊन त्याच्या डोक्यात हातोड्याने वार केल्याचा आरोप आहे. या हल्ल्यात तरुणाचा मृत्यू झाला असून, कोथरूड पोलिसांनी दोन्ही अल्पवयीन आरोपींना ताब्यात घेतले आहे.
मिळालेल्या माहितीनुसार, मृत तरुण आणि दोन्ही आरोपी एकमेकांचे मित्र होते. मात्र, तिघांचे राजकीय विचार वेगवेगळे होते. काही दिवसांपासून मृत तरुण सोशल मीडियावर विरोधी पक्षाच्या समर्थनार्थ स्टेटस ठेवत होता. यावरून आरोपींचा त्याच्याशी वाद सुरू झाला होता. स्टेटस ठेवण्यावरून वारंवार चर्चा आणि वाद होत असल्याचे सांगितले जात आहे.
याच रागातून आरोपींनी मृत तरुणाला विश्वासात घेऊन वेताळ टेकडी परिसरात नेले. तेथे पुन्हा याच मुद्द्यावरून तिघांमध्ये वाद झाला. वाद वाढल्यानंतर दोन्ही आरोपींनी हातोड्याने त्याच्या डोक्यावर जोरदार वार केल्याचा आरोप आहे. गंभीर दुखापत झाल्याने तरुणाचा मृत्यू झाला.
घटनेची माहिती मिळताच कोथरूड पोलिसांनी घटनास्थळी धाव घेतली. पोलिसांनी तपास सुरू करून दोन्ही अल्पवयीन मुलांना ताब्यात घेतले असून, त्यांच्याविरोधात हत्येचा गुन्हा दाखल करण्यात आला आहे.
सोशल मीडियावरील मतभेद आणि राजकीय विचारांमधील फरक इतका टोकाला जाऊ शकतो, की त्यातून थेट जीवघेणा हल्ला घडतो, ही बाब या घटनेमुळे पुन्हा अधोरेखित झाली आहे. विशेष म्हणजे, पुण्यात काही दिवसांपूर्वी सोशल मीडिया रील्सशी संबंधित वादातून अथर्व जगतापवर जीवघेणा हल्ला झाल्याची घटना समोर आली होती. त्यानंतर आता आठवड्याभरातच सोशल मीडिया आणि राजकीय मतभेदाच्या पार्श्वभूमीवर हत्येची घटना घडल्याने शहरात खळबळ उडाली आहे. या प्रकरणाचा पुढील तपास कोथरूड पोलीस करत आहेत.
