पुणे: पुणे महानगरपालिकेत दोन भाजप नगरसेविकांमध्ये झालेल्या वादामुळे राजकीय वातावरण तापले आहे. पुणे येथील बाणेर परिसरातील वसतिगृह प्रकल्पावरून माजी नगरसेविका राजश्री काळे (Rajashree Kale) आणि विद्यमान नगरसेविका रोहिणी चिमटे (Rohini Chimate) यांच्यात वाद निर्माण झाला. या वादाचे व्हिडिओ सोशल मीडियावर व्हायरल झाल्यानंतर प्रकरण अधिकच चर्चेत आले आहे. (Pune Politics)
या प्रकरणावर प्रतिक्रिया देताना राजश्री काळे यांनी रोहिणी चिमटे यांच्यावर गंभीर आरोप केले आहेत. त्यांनी म्हटले की, निकृष्ट दर्जाचे काम करणाऱ्या ठेकेदाराला काम मिळवून देण्यासाठी चिमटे आग्रही होत्या आणि हे सर्व कमिशनसाठी सुरू असल्याचा दावा त्यांनी केला. त्यामुळे प्रकल्पाच्या दर्जावर प्रश्नचिन्ह निर्माण झाल्याचे त्यांनी नमूद केले.
View this post on Instagram
मात्र रोहिणी चिमटे यांनी हे सर्व आरोप फेटाळले आहेत. त्यांनी सांगितले की, संबंधित काम त्यांच्या प्रभागात सुरू असल्याने त्याबाबत माहिती घेणे आणि अधिकाऱ्यांना प्रश्न विचारणे हा त्यांचा अधिकार आहे. वसतिगृह परिसरातील कंपाउंड वॉल खराब होण्याची शक्यता असल्याने नागरिकांनी तातडीने दुरुस्तीची मागणी केली होती, त्यामुळेच त्यांनी चौकशी केली, असे त्यांनी स्पष्ट केले.
चिमटे यांच्या मते, चौकशीदरम्यान उपस्थित असलेल्या व्यक्तीने गोंधळ घातल्याने वाद वाढला. नंतर त्या व्यक्तीची ओळख राजश्री काळे अशी असल्याचे समोर आले. दरम्यान, व्हायरल झालेल्या व्हिडिओमध्ये अर्वाच्य भाषा आणि शिवीगाळ झाल्याचेही दिसून येत आहे, ज्यामुळे प्रकरण अधिक गंभीर झाले आहे.
या घटनेची माहिती पक्षाच्या वरिष्ठ नेत्यांना देण्यात आली असून त्यांनी या प्रकरणात लक्ष घालण्याचे आश्वासन दिले आहे. या वादामुळे पुणे महापालिकेतील राजकीय वातावरण पुन्हा एकदा तापले असून पुढील घडामोडीकडे सर्वांचे लक्ष लागले आहे.
