पुणे: पुण्यातील सिंहगड किल्ला येथे ट्रेकिंगसाठी गेलेल्या पर्यटकाचा दुर्दैवी मृत्यू झाल्याची घटना समोर आली आहे. 55 वर्षीय सुरेश रघुनाथ भोकरे यांचा हृदयविकाराच्या तीव्र झटक्याने मृत्यू झाला. ते कात्रजमधील गोकुळनगर येथे राहत होते.
मिळालेल्या माहितीनुसार, सुरेश भोकरे हे मित्रांसोबत पहाटे ट्रेकिंगसाठी गेले होते. सकाळी 5 वाजता ते आतकरवाडी येथे पोहोचले आणि सव्वा 5 च्या सुमारास त्यांनी गड चढण्यास सुरुवात केली. पढेर मेटावरील मारुती मंदिराजवळ काही वेळ विश्रांती घेतल्यानंतर ते पुन्हा पुढे निघाले. मात्र याचदरम्यान अचानक त्यांना चक्कर आली आणि ते खाली कोसळले.
घटनेची माहिती मिळताच वनविभागाचे कर्मचारी बळीराम वायकर, नितीन गोळे, उत्तम खामकर आणि संदीप कोळी यांनी घटनास्थळी धाव घेत मदतकार्य केले. त्यांनी भोकरे यांना स्ट्रेचरवरून खाली आणून रुग्णालयात हलवले. मात्र डॉक्टरांनी उपचारापूर्वीच त्यांना मृत घोषित केले.
दरम्यान, वाढत्या उन्हामुळे आणि शारीरिक ताणामुळे अशा घटना घडत असल्याचे सांगत समाधान पाटील यांनी नागरिकांना सावध राहण्याचे आवाहन केले आहे. विशेषतः वृद्ध आणि आजारी व्यक्तींनी अशा कठीण ट्रेकिंगपासून दूर राहावे, असे त्यांनी सांगितले.
राज्यात सध्या उष्णतेची तीव्र लाट असून उष्माघातामुळे मृत्यूच्या घटनाही वाढत आहेत. त्यामुळे नागरिकांनी काळजी घेऊन दुपारच्या वेळेत घराबाहेर पडणे टाळावे, असे आवाहन प्रशासनाकडून करण्यात येत आहे.
