पुणे: पुणे आणि पिंपरी-चिंचवड परिसरात विषारी दारूमुळे झालेल्या मृत्यूंच्या घटनेनंतर प्रशासनाने कठोर पावले उचलण्यास सुरुवात केली आहे. या प्रकरणात आतापर्यंत 22 जणांचा मृत्यू झाल्याची माहिती समोर आली असून, बेकायदेशीर दारू विक्री आणि संबंधित यंत्रणांच्या भूमिकेवर गंभीर प्रश्न उपस्थित केले जात आहेत.
या प्रकरणातील प्रमुख आरोपी गुरुमंगलसिंग कर्नलसिंग विरका याच्या घरावरही आता कारवाईची प्रक्रिया सुरू करण्यात आली आहे. संबंधित बांधकाम अनधिकृत असल्याचा दावा करत महापालिकेने त्याला नोटीस बजावली आहे. 24 तासांच्या आत स्वतःहून बांधकाम हटवावे, अन्यथा प्रशासनाकडून ते पाडण्यात येईल, असा इशारा नोटीसमध्ये देण्यात आला आहे.
घटनेनंतर परिसरात शोक आणि संतापाचे वातावरण निर्माण झाले आहे. स्थानिक नागरिकांनी, विशेषतः महिलांनी, अनेक वर्षांपासून परिसरात बेकायदेशीर दारू विक्री सुरू असल्याचा आरोप केला आहे. याबाबत वेळोवेळी पोलिसांकडे तक्रारी करण्यात आल्या होत्या. मात्र, कारवाई केवळ तात्पुरती होत असे आणि काही दिवसांनंतर पुन्हा दारू विक्री सुरू होत असल्याचा आरोप नागरिकांनी केला आहे.
काही स्थानिकांनी पोलिसांच्या भूमिकेवरही प्रश्न उपस्थित केले आहेत. बेकायदेशीर व्यवसायाकडे दुर्लक्ष केल्यामुळेच ही गंभीर घटना घडल्याचा आरोप नागरिकांकडून करण्यात येत आहे. निष्पाप लोकांचा जीव गेल्यानंतर संबंधित यंत्रणांची जबाबदारी निश्चित करण्याची मागणीही होत आहे.
दरम्यान, या प्रकरणात मोठी प्रशासकीय कारवाई करण्यात आली आहे. बेकायदेशीर आणि संशयित बनावट मद्याचा पुरवठा रोखण्यात अपयश आल्याचा ठपका ठेवत पुणे पोलीस, पिंपरी-चिंचवड पोलीस आणि राज्य उत्पादन शुल्क विभागातील एकूण 22 अधिकारी आणि कर्मचाऱ्यांना निलंबित करण्यात आले आहे.
निलंबित अधिकाऱ्यांमध्ये पोलीस निरीक्षक, दुय्यम निरीक्षक तसेच विविध विभागांतील कर्मचारी यांचा समावेश असल्याचे सांगितले जात आहे. या संपूर्ण प्रकरणाचा तपास सुरू असून दोषींवर कठोर कारवाई करण्याची मागणी जोर धरत आहे.
