पुणे : राज्यभरात शिक्षक आणि पदवीधर निवडणुकीच्या निकालांची जोरदार चर्चा सुरू असतानाच, राष्ट्रवादी काँग्रेस पक्षाने आपल्या संघटनेत महत्त्वपूर्ण फेरबदल केले आहेत. गेल्या काही काळापासून रिक्त असलेल्या राष्ट्रवादीच्या मुंबई अध्यक्षपदी दिवंगत नेते बाबा सिद्दीकी यांचे सुपुत्र झिशान सिद्दीकी यांची नियुक्ती करण्यात आली आहे. खासदार पार्थ पवार यांच्या हस्ते झिशान यांना या नियुक्तीचे पत्र सोपवण्यात आले.
मुंबई अध्यक्षपदाची जबाबदारी मिळाल्यानंतर आनंद व्यक्त करताना झिशान सिद्दीकी यांनी सुनेत्रा पवार आणि पार्थ पवार यांचे आभार मानले. “पक्षाने माझ्यावर दाखवलेला विश्वास सार्थ ठरवून मुंबईत संघटन मजबूत करण्यावर माझा मुख्य भर असेल,” असे त्यांनी स्पष्ट केले. तसेच, अर्थखात्याचा पदभार यशस्वीपणे सांभाळण्यासाठी सुनेत्रा पवार पूर्णपणे सक्षम आहेत, असा विश्वासही त्यांनी यावेळी व्यक्त केला.
याचबरोबर पक्षाच्या राष्ट्रीय मुख्य प्रवक्तेपदी उमेश पाटील यांची निवड करण्यात आली आहे. देवगिरी या शासकीय निवासस्थानी आयोजित एका विशेष कार्यक्रमात उपमुख्यमंत्री सुनेत्रा पवार आणि पार्थ पवार यांच्या उपस्थितीत त्यांना नियुक्तीपत्र प्रदान करण्यात आले. स्व. अजितदादा पवार यांचे विचार आणि लोकसेवेचा वारसा पुढे नेण्यासाठी उमेश पाटील यांनी निष्ठेने काम करावे, अशी अपेक्षा यावेळी पक्षाच्या वरिष्ठ नेत्यांनी व्यक्त केली.
दुसऱ्या एका महत्त्वाच्या राजकीय घडामोडीत, मुंबई महापालिका निवडणुकीत महायुतीच्या उमेदवारांविरोधात काम करणाऱ्या शिवसेना पदाधिकाऱ्यांवर लवकरच कठोर कारवाई होण्याची शक्यता वर्तवली जात आहे. पक्षाविरोधी भूमिका घेतल्यामुळे निवडणुकीत महायुतीला मोठा फटका बसल्याचा आरोप त्यांच्यावर आहे.
