पुणे: आषाढी वारीची चाहूल लागताच राज्यभरातील वारकरी पंढरपूरच्या वारीच्या तयारीला लागतात. विठ्ठल दर्शनाची ओढ आणि नामस्मरणाचा उत्साह यामुळे लाखो भाविक आषाढी एकादशीची आतुरतेने वाट पाहत असतात. यंदा आषाढी एकादशी 25 जुलै 2026 रोजी असल्याने वारीचे नियोजन सुरू झाले आहे. दरम्यान, संत तुकाराम महाराजांच्या पालखी सोहळ्याचे वेळापत्रक जाहीर करण्यात आले असून 7 जुलैपासून पालखी पंढरपूरकडे प्रस्थान करणार आहे.
संत तुकाराम महाराजांच्या 341 व्या आषाढी पायी वारी सोहळ्याची तयारी अंतिम टप्प्यात पोहोचली आहे. 7 जुलै 2026 रोजी देहू येथील मुख्य मंदिरातून पालखी सोहळ्याला सुरुवात होणार आहे. विठ्ठल नामाचा गजर, टाळ-मृदुंगाचा नाद आणि भक्तीमय वातावरणात हजारो वारकरी पंढरपूरच्या दिशेने मार्गक्रमण करतील.
यंदाच्या पालखी सोहळ्यासाठी विक्रमसिंह मोरे, उमेश मोरे आणि लक्ष्मण मोरे यांची पालखी सोहळा प्रमुख म्हणून निवड करण्यात आली आहे. तसेच पालखी रथ आणि चौघडा गाडीसाठी तीन नवीन बैलजोड्यांचीही व्यवस्था करण्यात आली आहे. या बैलजोड्या यंदाच्या वारीत सहभागी होणार आहेत.
संत तुकाराम महाराजांच्या पालखीप्रमाणेच संत ज्ञानेश्वर माऊलींच्या पालखीबाबतही वारकऱ्यांमध्ये उत्सुकता आहे. आळंदीहून माऊलींची पालखी पंढरपूरकडे कधी रवाना होणार याकडेही भाविकांचे लक्ष लागले आहे. त्याचे वेळापत्रक लवकरच जाहीर होण्याची शक्यता आहे.
दरवर्षीप्रमाणे यंदाही राज्याच्या विविध भागांतून शेकडो पालख्या आणि हजारो दिंड्या पंढरपूरकडे निघणार आहेत. संत मुक्ताई, संत गजानन महाराज यांच्यासह अनेक संतांच्या पालख्या वारीत सहभागी होतात. शेगावहून निघणारी गजानन महाराजांची पालखीही वारकऱ्यांसह पायी प्रवास करते.
आषाढी एकादशीच्या दिवशी लाखो भाविक पंढरपुरात एकत्र येतात. चंद्रभागा नदीच्या तीरावर भक्तांचा महासागर पाहायला मिळतो. विठ्ठल-रुक्मिणीच्या दर्शनासाठी लांबच लांब रांगा लागतात आणि संपूर्ण पंढरी भक्तिरसात न्हाऊन निघते.
