पुणे: पुण्यातील नवले ब्रिज परिसरात रिक्षाचालकाला मारहाण करून पुलावरून (Pune Crime) खाली फेकल्याच्या धक्कादायक प्रकरणात पोलिसांनी तातडीने कारवाई करत 3 आरोपींना अटक केली आहे. प्रवासी घेण्याच्या वादातून हा हल्ला झाल्याचे प्राथमिक तपासात समोर आले आहे. या घटनेचा व्हिडिओ सोशल मीडियावर व्हायरल झाल्यानंतर पोलिसांनी विशेष पथकांच्या मदतीने आरोपींना ताब्यात घेतले. (Latest Marathi News)
या प्रकरणी आंबेगाव पोलीस ठाण्यात गुन्हा दाखल करण्यात आला आहे. अटक करण्यात आलेल्या आरोपींची नावे बापूसो बाळासाहेब भोसले, गणेश हरिभाऊ धारपले आणि गणेश उर्फ भावड्या हरिभाऊ धरपाळे अशी आहेत. पोलिसांनी आरोपींच्या शोधासाठी स्वतंत्र पथके तयार केली होती. व्हिडिओ समोर आल्यानंतर काही तासांतच त्यांना अटक करण्यात आली.
मिळालेल्या माहितीनुसार, कात्रज ते नवले ब्रिज महामार्ग परिसरात प्रवासी घेण्याच्या कारणावरून काही रिक्षाचालकांमध्ये वाद निर्माण झाला होता. सुरुवातीला शाब्दिक वाद झाल्यानंतर हा प्रकार अचानक हिंसक स्वरूपात बदलला. आरोपींनी सुरज माणिक काळे या रिक्षाचालकाला रस्त्यात अडवून बेदम मारहाण केल्याचा आरोप आहे.
या हल्ल्यात लाथाबुक्क्यांसह धारदार शस्त्र आणि इतर वस्तूंचा वापर केल्याची माहिती समोर आली आहे. मारहाणीत गंभीर जखमी झाल्यानंतर सुरज काळे यांना राजमाता भुयारी मार्गाजवळील पुलावरून खाली फेकण्यात आल्याचा धक्कादायक प्रकार उघड झाला आहे. या घटनेमुळे परिसरात भीतीचे वातावरण निर्माण झाले.
जखमी अवस्थेत सुरज काळे यांना तातडीने भारती विद्यापीठ रुग्णालयात दाखल करण्यात आले. सध्या त्यांच्यावर उपचार सुरू असून त्यांची प्रकृती स्थिर असल्याची माहिती पोलिसांनी दिली आहे.
या घटनेचा व्हिडिओ व्हायरल झाल्यानंतर पोलिसांनी तातडीने तपास सुरू केला. आरोपींना अटक केल्यानंतर पुढील चौकशी सुरू असून या प्रकरणाचा सखोल तपास आंबेगाव पोलीस करत आहेत. शहरात अशा प्रकारच्या हिंसक घटनांमुळे नागरिकांमध्ये चिंता व्यक्त केली जात आहे.
