पुणे: सरकारी नोकरीच्या आमिषाला बळी पडल्याने एका पालकाची तब्बल ११ लाख रुपयांची फसवणूक झाल्याचा धक्कादायक प्रकार पुण्यात उघडकीस आला आहे. पिंपरी-चिंचवड महापालिकेत लिपिक पदावर नोकरी लावून देण्याचे आश्वासन देत आरोपीने लाखो रुपये उकळले. मात्र, ना नोकरी मिळाली, ना संपूर्ण पैसे परत मिळाले. या प्रकरणी लोणीकंद पोलीस ठाण्यात फसवणुकीचा गुन्हा दाखल करण्यात आला असून, पोलिसांनी तपास सुरू केला आहे.
पोलिसांनी दिलेल्या माहितीनुसार, तक्रारदार लोणीकंद परिसरातील रहिवासी आहेत. २०२२ मध्ये त्यांची गणेश जाधव नावाच्या व्यक्तीशी ओळख झाली. त्यावेळी जाधवने पिंपरी-चिंचवड महापालिकेत आपले वरिष्ठ अधिकाऱ्यांशी चांगले संबंध असल्याचा दावा केला. त्याने तक्रारदाराच्या मुलाला महापालिकेत लिपिक पदावर सरकारी नोकरी मिळवून देण्याचे आश्वासन दिले.
आरोपीच्या बोलण्यावर विश्वास ठेवून तक्रारदाराने वेळोवेळी त्याच्याकडे एकूण ११ लाख ५० हजार रुपये दिले. अनेक महिने उलटल्यानंतरही नोकरीबाबत कोणतीही प्रगती झाली नाही. यानंतर तक्रारदाराला संशय आला आणि त्यांनी आरोपीकडे दिलेल्या पैशांची मागणी सुरू केली. सुरुवातीला आरोपीने विविध कारणे सांगत वेळकाढूपणा केला. सततच्या पाठपुराव्यानंतर त्याने केवळ ५० हजार रुपये परत केले. मात्र, उर्वरित ११ लाख रुपये देण्यास नकार दिल्याने आपली फसवणूक झाल्याचे तक्रारदाराच्या लक्षात आले.
अखेर त्यांनी लोणीकंद पोलीस ठाण्यात धाव घेत तक्रार दाखल केली. त्यानुसार पोलिसांनी गणेश जाधव याच्याविरुद्ध फसवणुकीचा गुन्हा नोंदवला आहे. या प्रकरणात आणखी कोणी फसवणुकीला बळी पडले आहे का, तसेच सरकारी नोकरीच्या नावाखाली अशा प्रकारचे रॅकेट कार्यरत आहे का, याचाही तपास पोलीस करत आहेत. सरकारी नोकरीच्या आमिषाला बळी न पडता कोणालाही पैसे देण्यापूर्वी संबंधित व्यक्तीची आणि दाव्यांची खातरजमा करण्याचे आवाहनही पोलिसांकडून करण्यात येत आहे.
