पुणे : पुणे आणि पिंपरी-चिंचवडकरांसाठी महत्त्वाची ठरणाऱ्या हिंजवडी ते शिवाजीनगर मेट्रो मार्गाबाबत मोठी अपडेट समोर आली आहे. मेट्रो मार्ग-३चा पहिला टप्पा आगामी गणेशोत्सवाच्या पार्श्वभूमीवर सप्टेंबर २०२६च्या पहिल्याच आठवड्यात प्रवाशांसाठी सुरू करण्याचे नियोजन प्रशासनाकडून करण्यात येत आहे. त्यामुळे अनेक दिवसांपासून या मार्गाची वाट पाहणाऱ्या नागरिकांना लवकरच दिलासा मिळण्याची शक्यता आहे.
हिंजवडी परिसर हा पुण्यातील महत्त्वाचा आयटी हब असल्याने दररोज हजारो कर्मचारी या भागात ये-जा करतात. सध्याच्या रस्ते वाहतुकीमुळे या मार्गावर मोठ्या प्रमाणात वाहतूक कोंडीचा सामना करावा लागतो. मेट्रो सेवा सुरू झाल्यानंतर आयटी पार्कमध्ये जाणाऱ्या आणि तेथून परतणाऱ्या नोकरदारांचा प्रवास अधिक वेगवान आणि सोयीस्कर होण्याची अपेक्षा आहे.
मेट्रो मार्गाच्या कामाचा आढावा घेण्यासाठी पुणे महानगर प्रदेश विकास प्राधिकरणाच्या (PMRDA) आयुक्तांनी संपूर्ण मार्गाची आणि स्थानकांची पाहणी केली. यावेळी स्थानकांवरील तिकीट व्यवस्था, लिफ्ट, एस्कलेटर तसेच प्रवाशांच्या सुरक्षेशी संबंधित विविध सुविधांची तपासणी करण्यात आली. उर्वरित कामे वेळेत पूर्ण करण्याचे निर्देश संबंधित अधिकाऱ्यांना देण्यात आले आहेत.
दरम्यान, मेट्रो रेल्वे सुरक्षा आयुक्तांच्या (CMRS) मार्गदर्शक तत्त्वांनुसार आवश्यक तांत्रिक चाचण्या पूर्ण करण्यात आल्याची माहिती आहे. सिग्नलिंग आणि विद्युत यंत्रणांचीही तपासणी करण्यात आली आहे. त्यामुळे प्रत्यक्ष प्रवासी सेवा सुरू करण्याच्या दृष्टीने महत्त्वाची प्रक्रिया पूर्ण झाल्याचे सांगितले जात आहे.
मात्र, प्रवासी वाहतूक सुरू करण्यासाठी अंतिम सुरक्षा मंजुरी मिळणे आवश्यक आहे. ही मंजुरी मिळाल्यानंतर मेट्रोचा पहिला टप्पा प्रवाशांसाठी खुला केला जाईल.
हा मार्ग सुरू झाल्यास हिंजवडी, वाकड आणि शिवाजीनगरदरम्यानच्या प्रवाशांना मोठा फायदा होणार असून, पुण्यातील रस्त्यांवरील वाहतूक कोंडी कमी करण्यासही मेट्रो महत्त्वाची भूमिका बजावू शकते. त्यामुळे गणेशोत्सवापूर्वी किंवा त्याच काळात मेट्रो सेवा सुरू होते का, याकडे पुणेकरांचे लक्ष लागले आहे.
