पुणे: स्वतःला ईश्वराचा अवतार असल्याचे सांगून एका उच्चशिक्षित महिलेचे तब्बल 17 वर्षे मानसिक, शारीरिक आणि लैंगिक शोषण केल्याचा आरोप असलेल्या भोंदूबाबा राधामोहन मिश्राच्या अडचणी वाढल्या आहेत. या प्रकरणाचा तपास करणाऱ्या पुणे पोलिसांना महत्त्वाचे पुरावे मिळाले असले तरी आरोपी तपासात कोणतेही सहकार्य करत नसल्याचे समोर आले आहे. (Pune Crime)
पोलिसांनी मिश्राच्या ताब्यातील एक लॅपटॉप जप्त केला आहे. या लॅपटॉपमध्ये महिलेशी संबंधित आक्षेपार्ह फोटो आणि व्हिडिओ असल्याचा संशय आहे. मात्र, लॅपटॉपचा पासवर्ड सांगण्यास मिश्रा आणि त्याचे साथीदार नकार देत आहेत. त्यामुळे या डिजिटल पुराव्यांची तपासणी करणे पोलिसांसाठी मोठे आव्हान ठरत आहे.
यापूर्वी पोलिसांनी आश्रमावर छापा टाकून मोठी कारवाई केली होती. या कारवाईत जिवंत काडतुसे, सोन्या-चांदीचे दागिने तसेच मोठी रोख रक्कम जप्त करण्यात आली होती. मात्र, ही काडतुसे कोणत्या शस्त्रासाठी वापरली जात होती, संबंधित शस्त्र कुठे आहे आणि जप्त केलेली संपत्ती कुठून आली याबाबत आरोपी मौन बाळगून आहेत.
तपासादरम्यान या प्रकरणाचे धागेदोरे हरियाणापर्यंत पोहोचल्याची माहिती पोलिसांना मिळाली आहे. त्यामुळे या संपूर्ण रॅकेटचा पर्दाफाश करण्यासाठी विशेष पथकाला हरियाणात जाऊन अधिक तपास करावा लागणार आहे.
या प्रकरणात राधामोहन मिश्रा आणि स्वामी कवलनयन यांच्यासह सहा महिलांना अटक करण्यात आली आहे. सर्व आरोपींची पोलीस कोठडी संपल्यानंतर त्यांना न्यायालयात हजर करण्यात आले. तपासासाठी आणखी वेळ आवश्यक असल्याचे सरकारी पक्षाने न्यायालयाला सांगितले. त्यानंतर न्यायालयाने सर्व आरोपींची पोलीस कोठडी आणखी दोन दिवसांसाठी वाढवली आहे. दरम्यान, पोलिसांकडून जप्त करण्यात आलेल्या डिजिटल उपकरणांची तपासणी सुरू असून या प्रकरणातील आणखी धक्कादायक माहिती समोर येण्याची शक्यता व्यक्त केली जात आहे.
