Tamhini Ghat Accident: नवी मुंबई: ताम्हिणी घाटात पुन्हा एकदा भीषण अपघाताची घटना घडली आहे. काही आठवड्यांपूर्वी पुण्यातील सहा तरुणांचा मृत्यू झालेल्या ठिकाणाजवळच मंगळवारी आणखी एका वाहनाचा अपघात झाला. माणगाव हद्दीत हुंडई ऑरा ही कार खोल दरीत कोसळून चालकाचा जागीच मृत्यू (Death) झाला. या घटनेमुळे परिसरात एकच खळबळ उडाली असून ताम्हिणी घाटातील सुरक्षेचा मुद्दा पुन्हा ऐरणीवर आला आहे. (Tamhini Ghat Accident)
मंगळवारी दुपारच्या सुमारास ही कार ताम्हिणी घाटातून जात असताना अचानक चालकाचे वाहनावरील नियंत्रण सुटले. त्यानंतर कार थेट सुमारे 700 ते 800 मीटर खोल दरीत कोसळली. अपघाताची तीव्रता इतकी मोठी होती की कार पूर्णपणे चिरडली गेली. दरी अतिशय खोल आणि दुर्गम असल्याने बचाव कार्यात अडचणी आल्या. पोलिस आणि स्थानिक बचाव पथकांनी ड्रोनच्या मदतीने वाहनाचा आणि चालकाचा शोध घेतला.
या अपघातात शुभम असे मृत चालकाचे नाव असून तो पुण्याचा रहिवासी असल्याची माहिती पोलिसांनी दिली आहे. शुभम हा गाडी चालवत असताना अपघातग्रस्त झाला आणि वाहनाच्या तुटलेल्या अवशेषांमध्ये अडकून पडला होता. त्याला वाचवणे शक्य झाले नाही. अपघातानंतर त्याचा मृतदेह मोठ्या प्रयत्नांनी दरीतून बाहेर काढण्यात आला.
माणगाव पोलिस ठाण्याचे सहाय्यक पोलिस निरीक्षक निवृत्ती बोऱ्हाडे यांनी सांगितले की, शुभम हा पुण्याहून येत होता. तो नेमका कुठे जात होता आणि अपघात कसा झाला याबाबत सध्या स्पष्ट माहिती मिळालेली नाही. संबंधित कारकडे पर्यटन परवाना असल्याने तो ड्रायव्हिंग व्यवसाय करत असावा, असा प्राथमिक अंदाज आहे.
ताम्हिणी घाटात यापूर्वीही अशा अपघातांच्या घटना घडल्या आहेत. अरुंद रस्ते, तीव्र वळणे आणि सुरक्षिततेच्या अपुऱ्या उपाययोजनांमुळे अपघातांचे प्रमाण वाढत असल्याचे स्थानिक नागरिक सांगतात. या घटनेनंतर घाटातील वाहतूक सुरक्षेबाबत ठोस पावले उचलण्याची मागणी पुन्हा जोर धरू लागली आहे.
