पुणे: पुण्यात शिक्षणासाठी आलेल्या १८ वर्षीय तरुणीला कोल्डड्रिंकच्या बाटलीत गुंगीचे औषध मिसळून पाजल्याचा आणि तिला बळजबरीने घेऊन जाण्याचा प्रयत्न केल्याचा धक्कादायक प्रकार समोर आला आहे. या प्रकरणी सहकारनगर पोलिसांनी मेसचालकाला अटक केली आहे. निलेश सोनू वाझे (३९, रा. चैतन्यनगर, धनकवडी) असे अटक केलेल्या आरोपीचे नाव आहे. ही घटना ४ सप्टेंबर रोजी सायंकाळी पाचच्या सुमारास घडली.
पोलिसांनी दिलेल्या माहितीनुसार, संबंधित तरुणी शिक्षणासाठी पुण्यात आली असून ती एका मुलींच्या वसतिगृहात राहते. निलेश वाझे याने तिच्याकडून २० हजार रुपये उसने घेतले होते. तरुणीने पैसे परत मागितल्यानंतर वाझे याने त्याच्याकडील सोने गहाण ठेवून पैसे देतो, असे सांगितले. त्यासाठी राजगुरुनगर येथील सोनाराकडे जायचे असल्याचे सांगून त्याने तरुणीला मोटारसायकलवर बसवून सोबत नेले.
प्रवासादरम्यान एका ठिकाणी थांबल्यानंतर वाझे याने कोल्डड्रिंकमध्ये काहीतरी मिसळून ते तरुणीला पिण्यास दिले, असा आरोप आहे. ते प्यायल्यानंतर तिला चक्कर आल्यासारखे झाले. त्यानंतर वाझे तिला बळजबरीने अन्य ठिकाणी घेऊन जाण्याचा प्रयत्न करू लागला. मात्र, तरुणीला संशय आल्याने ती सावध झाली आणि त्याच्या तावडीतून स्वतःची सुटका करून घेतली.
त्यानंतर तिने उबर कॅब बुक करून आपल्या वसतिगृहात परतण्याचा निर्णय घेतला. सुरक्षितपणे वसतिगृहात पोहोचल्यानंतर दुसऱ्या दिवशी तिने सहकारनगर पोलिस ठाण्यात तक्रार दाखल केली. तिच्या तक्रारीवरून पोलिसांनी अनैतिक कृत्य करण्याच्या उद्देशाने अपहरणाचा प्रयत्न केल्याप्रकरणी गुन्हा दाखल केला.
या प्रकरणात पोलिसांनी निलेश वाझे याला अटक केली असून, घटनेचा पुढील तपास पोलीस हवालदार किंद्रे करीत आहेत.
