पुणे : पुण्यात एका २१ वर्षीय महाविद्यालयीन तरुणीवर चार जणांनी वर्षभर लैंगिक अत्याचार केल्याचा धक्कादायक प्रकार समोर आला आहे. अश्लील व्हिडिओ व्हायरल करण्याची धमकी देत आरोपींनी वारंवार अत्याचार केल्याचा आरोप पीडितेने केला असून, या प्रकरणी वाघोली पोलिसांनी चार आरोपींना अटक केली आहे.
पोलिसांनी दिलेल्या माहितीनुसार, पीडित तरुणी ही विमाननगर परिसरात राहणारी असून तिने २०२५ मध्ये पुण्यातील एका नामांकित महाविद्यालयात प्रवेश घेतला होता. याच महाविद्यालयात तिची फरान शेख याच्याशी ओळख झाली. पुढे ही ओळख मैत्रीत बदलली.
पीडितेच्या तक्रारीनुसार, मैत्रीचा गैरफायदा घेत फरान शेख याने तिच्यावर वारंवार लैंगिक अत्याचार केले. त्यानंतर अश्लील व्हिडिओ व्हायरल करण्याची धमकी देत फरानसह त्याचे मित्र फजल शेख, रेहान शेख आणि साहिल यांनीही गेल्या वर्षभरात विविध ठिकाणी तिच्यावर वारंवार लैंगिक अत्याचार केल्याचा आरोप करण्यात आला आहे.
पीडित तरुणीच्या फिर्यादीवरून वाघोली पोलीस ठाण्यात गुन्हा दाखल करण्यात आला असून, फरान शेख, फजल शेख, रेहान शेख आणि साहिल या चौघांना अटक करण्यात आली आहे. सध्या सर्व आरोपी पोलिसांच्या ताब्यात असून प्रकरणाचा पुढील तपास वाघोली पोलीस करत आहेत.
