पुणे : पावसाळ्यात जड व मालवाहू वाहने अडकून वाहतूक कोंडी होऊ नये, यासाठी पुणे शहर पोलीस आयुक्तालयाच्या हद्दीत जड आणि अवजड वाहनांच्या प्रवेशावर घालण्यात आलेली बंदी पुढील आदेशापर्यंत कायम ठेवण्यात आली आहे. जिल्हाधिकारी तथा जिल्हादंडाधिकारी जितेंद्र डूडी यांनी हा आदेश जारी केला असून, संबंधित वाहनचालकांना पर्यायी मार्गांचा वापर करण्याचे आवाहन करण्यात आले आहे.
सोलापूरकडून मुंबईकडे जाणाऱ्या वाहनांनी केडगाव–चौफुला–न्हावरे–तळेगाव ढमढेरे–शिक्रापूर–चाकण मार्ग किंवा उरळी कांचन–कोरेगाव मूळ–अष्टापूर–तळेगाव ढमढेरे–शिक्रापूर–चाकण मार्गाचा वापर करावा.
मुंबईहून सोलापूरकडे जाणाऱ्या वाहनांसाठी तळेगाव दाभाडे–चाकण–शिक्रापूर–तळेगाव ढमढेरे–न्हावरे–केडगाव–चौफुला–सोलापूर महामार्ग तसेच तळेगाव दाभाडे–चाकण–शिक्रापूर–तळेगाव ढमढेरे–अष्टापूर–कोरेगाव मूळ–उरळी कांचन हे मार्ग सुचविण्यात आले आहेत. तसेच कात्रज–मंतरवाडी फाटा–वडकी–दिवे घाट–सासवड–जेजुरी–मोरगाव–सुपे–केडगाव चौफुला मार्गाचाही वापर करता येईल.
मुंबईहून अहिल्यानगरकडे जाणाऱ्या वाहनांनी तळेगाव–चाकण–खेड–मंचर–नारायणगाव–आळेफाटा–अहिल्यानगर मार्गाचा वापर करावा. तर अहिल्यानगरहून मुंबईकडे जाणाऱ्या वाहनांसाठी शिक्रापूर–चाकण–तळेगाव हा पर्यायी मार्ग निश्चित करण्यात आला आहे.
सासवडहून सोलापूरकडे जाणाऱ्या वाहनांनी सासवड–जेजुरी–मोरगाव–सुपे–केडगाव–चौफुला मार्गाचा वापर करावा, असेही प्रशासनाने स्पष्ट केले आहे.
दरम्यान, पुणे शहरात मालाची चढ-उतार करणाऱ्या जड वाहनांना रात्री ११ ते सकाळी ६ या वेळेतच प्रवेश दिला जाणार आहे. अहिल्यानगरकडून येणाऱ्या वाहनांनी नगर रोड–वाघोली–खराडी बायपास–शास्त्रीनगर चौक–गोल्फ क्लब चौक–आळंदी रोड जंक्शन–चंद्रमा चौक–पोल्ट्री चौक–हॅरिस ब्रिज मार्गे इच्छित स्थळी जावे.
सोलापूरकडून येणाऱ्या वाहनांनी मगरपट्टा–भैरोबानाला–लुल्लानगर चौक–गंगाधाम चौक–मार्केट यार्ड मार्गाचा वापर करावा. सातारा, सांगली आणि कोल्हापूरकडे जाणाऱ्या वाहनांसाठी बेंगळुरू महामार्ग–नवले पूल–कात्रज चौक–मार्केट यार्ड हा मार्ग निश्चित करण्यात आला आहे. तसेच मुंबई आणि नाशिककडून पुण्यात येणाऱ्या वाहनांनी हॅरिस ब्रिज–बोपोडी–चंद्रमा चौक–गोल्फ क्लब चौक–मार्केट यार्ड मार्गाचा वापर करावा, असे आवाहन प्रशासनाने केले आहे.
