लोणी काळभोर: पुणे – सोलापूर महामार्गावरील (Pune-Solapur Highway) भरधाव रिक्षाच्या धडकेत पादचारी तरुणाचा उपचारादरम्यान मृत्यू झाल्याची घटना शेवाळवाडी (Shewalewadi Accident) परिसरात घडली. शुक्रवारी (ता. 12) पहाटे सव्वापाचच्या सुमारास शेवाळवाडी (ता. हवेली) परिसरात हि घटना घडली आहे. या प्रकरणी पोलिसांनी रिक्षाचालकाविरुद्ध गुन्हा दाखल केला.
नारायण शाहूराज सूर्यवंशी (वय-36) असे मृत्युमुखी पडलेल्या पादचाऱ्याचे नाव आहे. या प्रकरणी रिक्षाचालकाविरुद्ध गुन्हा दाखल करण्यात आला आहे. याबाबत किरण रमेश कात्रे (वय-33, रा. साईश्रद्धा पार्क, गोपाळपट्टी, मांजरी, हडपसर) यांनी हडपसर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, रिक्षाचालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, कात्रे यांचा आतेभाऊ नारायण सूर्यवंशी हे शुक्रवारी (12 सप्टेंबर) पहाटे सव्वापाचच्या सुमारास पुणे-सोलापूर महामार्गावरील शेवाळवाडी परिसरातून निघाले होते. त्यावेळी पाठीमागून येणाऱ्या भरधाव रिक्षाने त्यांना धडक दिली. या अपघातात ते गंभीर जखमी झाले. अपघातानंतर घटनास्थळी न थांबता रिक्षाचालक पसार झाला.
दरम्यान, सूर्यवंशी यांना उपचारसाठी रुग्णालयात दाखल करण्यात आले. उपचारादरम्यान त्यांचा मृत्यू झाला. अपघातानंतर पसार झालेल्या रिक्षाचालकाचा शोध घेण्यात येत आहे. किरण रमेश कात्रे यांनी दिलेल्या तक्रारीनुसार हडपसर पोलीस ठाण्यात 796/2025, भा.न्या.सं.क. 106 (1), 125 (ब), 281, मो. वा. का.क.184, 119/177 नुसार गुन्हा दाखल करण्यात आला आहे.
