पुणे : पुणे रेल्वे स्टेशन (Pune Railway station) परिसरात रात्री उशिरा आलेल्या एका तरुणावर तीन अनोळखी व्यक्तींनी हल्ला केल्याची धक्कादायक घटना घडली आहे. या हल्ल्यात जखमी झालेल्या तरुणावर सध्या ससून रुग्णालयात उपचार सुरू असून, या प्रकरणी पोलिसांनी तीन अज्ञात आरोपींवर गुन्हा दाखल केला असून त्यांचा शोध सुरू आहे.

संतोष अमित जाधव (वय 22, रा. गंगानगर, नांदेड) असे जखमी तरुणाचे नाव आहे. तो कामासाठी नांदेडहून पुण्यात आला होता. 9 सप्टेंबर रोजी पहाटे 5 वाजण्याच्या सुमारास तो रेल्वे स्टेशनच्या ‘फलाट क्रमांक एक’ जवळील व्हीआयपी सायडिंग परिसरात उतरला. त्याचवेळी तीन अनोळखी तरुणांनी त्याला अडवून पैशांची मागणी केली. संतोषने पैसे देण्यास नकार दिल्यावर आरोपींनी त्याला लाथा-बुक्क्यांनी मारहाण केली. त्यानंतर एका आरोपीने चाकू काढून त्याच्या पोटावर वार केला.
या घटनेनंतर गंभीर जखमी झालेल्या संतोषला तात्काळ ससून रुग्णालयात दाखल करण्यात आले. डॉक्टरांनी दिलेल्या माहितीनुसार, त्याची प्रकृती सध्या स्थिर आहे. या घटनेनंतर बंडगार्डन पोलिसांनी जबरी चोरी आणि जीवघेण्या हल्ल्याचा गुन्हा दाखल केला आहे. आरोपींना पकडण्यासाठी पोलीस सीसीटीव्ही फुटेज आणि साक्षीदारांची मदत घेत आहेत. या घटनेमुळे पुणे रेल्वे स्टेशनवर प्रवाशांच्या सुरक्षेचा प्रश्न पुन्हा एकदा ऐरणीवर आला आहे.








