पुणे: पुण्यातील दौंड तालुक्यात पत्नी दुसऱ्या तरुणासोबत राहत असल्याच्या रागातून पतीने तिच्या डोक्यात दगडाने वार करून हत्या केल्याची धक्कादायक घटना बोरीभडक येथे घडली. ७ ऑगस्ट रोजी रात्री साडेनऊच्या सुमारास ही घटना घडल्याची माहिती पोलिसांनी दिली आहे.
आचल यादव (वय अंदाजे १८) असे मृत तरुणीचे नाव आहे. या प्रकरणी तिचा पती शंकर बकस सिंग (वय २२, रा. खवपुर, जि. अमेठी, उत्तर प्रदेश) याला यवत पोलिसांनी अटक केली आहे.
पोलिसांकडे दाखल झालेल्या तक्रारीनुसार, बोरीभडक गावाच्या हद्दीत पुणे-सोलापूर महामार्गाच्या सोलापूरकडे जाणाऱ्या मार्गापासून सुमारे १५० मीटर अंतरावरील मोकळ्या जागेत हा प्रकार घडला. आचल ही पतीपासून वेगळी राहत होती आणि रोहन गवळी याच्यासोबत राहत असल्याने शंकरच्या मनात तिच्याबद्दल राग असल्याचे तक्रारीत नमूद करण्यात आले आहे.
याच कारणातून आरोपीने आचलला शिवीगाळ करून जीवे मारण्याची धमकी दिल्याचा आरोप आहे. त्यानंतर तिच्या डोक्यात दगडाने हल्ला केल्याचे पोलिसांना दिलेल्या तक्रारीत नमूद आहे. या हल्ल्यात आचल गंभीर जखमी झाली आणि तिचा मृत्यू झाला.
या प्रकरणी रोहन मच्छिंद्र गवळी यांच्या फिर्यादीवरून यवत पोलीस ठाण्यात गुन्हा दाखल करण्यात आला आहे. पोलिसांनी आरोपीला अटक करून न्यायालयात हजर केले. न्यायालयाने त्याला १२ ऑगस्टपर्यंत पोलीस कोठडी सुनावली आहे.
हत्येमागील नेमके कारण, घटनेपूर्वी आरोपी आणि मृत तरुणीमध्ये काय घडले आणि या प्रकरणातील इतर बाबींचा तपास पोलीस करत आहेत. पुढील तपास पोलीस उपनिरीक्षक सागर माने करीत आहेत.
