पुणे: पुण्यातील महंमदवाडी परिसरात मुलगी व्यवस्थित राहत नसल्याच्या कारणावरून झालेल्या वादातून तिच्या वडिलांच्या डोक्यात दगड घालून हत्या केल्याची धक्कादायक घटना समोर आली आहे. विशेष म्हणजे, हल्ल्यानंतर जखमी अवस्थेत आरोपी स्वतःच पोलीस ठाण्यात पोहोचला आणि त्याने खुनाची माहिती पोलिसांना दिली. काळेपडळ पोलिसांनी त्याला अटक केली आहे.
सैफन बाबुलाल सय्यद (वय ४३, रा. राजीव गांधी कॉलनी, तरवडे वस्ती, हडपसर) असे मृत व्यक्तीचे नाव आहे. हनुमंत ऊर्फ सागर सुग्रीव कांबळे (वय २५, रा. आशिर्वाद पार्क, महंमदवाडी) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, रविवारी रात्री साडेदहाच्या सुमारास महंमदवाडी येथील लक्ष्मी पार्कजवळील वन परिसरात सिमेंटच्या टाकीजवळ हा प्रकार घडला. सना ही सैफन सय्यद यांची मुलगी असून तिचे आंतरधर्मीय विवाह झाले आहेत. ती आरोपीच्या बहिणीच्या मुलासोबत राहत होती.
सना ही सासरी व्यवस्थित राहत नसल्याच्या कारणावरून सैफन सय्यद आणि हनुमंत कांबळे यांच्यात वाद झाला. या वादातून संतापलेल्या हनुमंतने सैफन यांच्या डोक्यात दगडाने हल्ला केल्याचा आरोप आहे. या हल्ल्यात सैफन यांचा मृत्यू झाला.
घटनेनंतर रात्री साडेअकराच्या सुमारास हनुमंत कांबळे काळेपडळ पोलीस ठाण्यात पोहोचला. त्याच्या गळ्याजवळ जखम झाली होती आणि कपड्यांवर रक्ताचे डाग होते. पोलिसांनी चौकशी केली असता त्याने सैफन सय्यद यांची हत्या केल्याचे सांगितले. मुलगी सना आमच्याकडे व्यवस्थित राहत नसल्याने वाद झाल्याचेही त्याने पोलिसांना सांगितले.
घटनेची माहिती मिळताच पोलिसांनी घटनास्थळी जाऊन पाहणी केली. याप्रकरणी पोलीस हवालदार विजया जयदीप चव्हाण यांच्या फिर्यादीवरून गुन्हा दाखल करण्यात आला आहे. काळेपडळ पोलिसांनी हनुमंत कांबळे याला अटक केली असून, हत्येमागील नेमका घटनाक्रम आणि वादाची इतर कारणे याबाबत पुढील तपास सुरू आहे.
