पिंपरी-चिंचवड: पिंपरी-चिंचवडमधील म्हेत्रे वस्ती परिसरात चार वर्षांच्या चिमुरडीवर सात भटक्या कुत्र्यांनी हल्ला केल्याची धक्कादायक घटना समोर आली आहे. रविवारी दुपारी घडलेल्या या घटनेची दृश्ये परिसरातील सीसीटीव्ही कॅमेऱ्यात कैद झाली आहेत. हल्ल्यात चिमुरडी गंभीर जखमी झाली असून तिच्यावर रुग्णालयात उपचार सुरू आहेत.
मिळालेल्या माहितीनुसार, चिमुरडी रविवारी दुपारी घरासमोरील मोकळ्या जागेत खेळण्यासाठी गेली होती. त्यावेळी परिसरात असलेल्या कुत्र्यांच्या टोळीने अचानक तिच्याकडे धाव घेतली. घाबरलेली चिमुरडी तेथून पळण्याचा प्रयत्न करत असताना दोन कुत्र्यांनी तिच्यावर झडप घातली. त्यामुळे ती खाली पडली.
यानंतर आणखी पाच कुत्रे तिच्याभोवती जमा झाले आणि त्यांनी तिच्यावर हल्ला करण्यास सुरुवात केली. काही वेळ चिमुरडी कुत्र्यांच्या गराड्यात अडकली होती. तिच्या ओरडण्याचा आवाज ऐकून परिसरातील नागरिकांनी तातडीने घटनास्थळी धाव घेतली. नागरिकांनी कुत्र्यांना दूर करत चिमुरडीची सुटका केली. त्यामुळे मोठा अनर्थ टळला.
या हल्ल्यात चिमुरडीला गंभीर दुखापत झाली असून तिला तातडीने रुग्णालयात दाखल करण्यात आले. तिच्यावर सध्या उपचार सुरू आहेत.
View this post on Instagram
या घटनेनंतर म्हेत्रे वस्ती परिसरातील नागरिकांमध्ये भीतीचे वातावरण निर्माण झाले आहे. विशेषतः लहान मुले घराबाहेर खेळण्यासाठी जात असताना भटक्या कुत्र्यांच्या टोळ्यांपासून त्यांच्या सुरक्षेचा प्रश्न पुन्हा ऐरणीवर आला आहे.
परिसरातील भटक्या कुत्र्यांची संख्या वाढत असून त्यांच्याकडून नागरिकांना धोका निर्माण होण्याची शक्यता आहे. त्यामुळे संबंधित प्रशासनाने या घटनेची गंभीर दखल घेऊन भटक्या कुत्र्यांचा बंदोबस्त करण्यासाठी तातडीने उपाययोजना कराव्यात, अशी मागणी स्थानिक नागरिकांकडून करण्यात येत आहे.
