केडगाव : केडगाव (ता. दौंड) येथील नामांकित ‘जवाहरलाल विद्यालय’ परिसरात जुन्या किरकोळ भांडणाचा राग मनात धरून 10 जणांच्या टोळक्याने बेकायदेशीर जमाव जमवून इयत्ता 12 वीत शिकणाऱ्या एका विद्यार्थ्याला शिवीगाळ करत लाथाबुक्क्यांनी अमानुष मारहाण केली. इतकेच नाही तर डोक्यात व कपाळावर थेट दगड मारून त्याला गंभीर जखमी केल्याची धक्कादायक घटना समोर आली आहे.
बुधवारी (ता. 02) सकाळी अकरा वाजण्याच्या सुमारास जवाहरलाल विद्यालयाच्या मुख्य प्रवेशद्वारासमोरील कॉर्नरवर भरदिवसा हा हिंसक प्रकार घडला. या घटनेने केडगाव परिसरात पालकांमध्ये व विद्यार्थ्यांमध्ये प्रचंड घबराट पसरली आहे.अजिंक्य मोहन बोरकर (वय 18, रा. खैरे फाटा, केडगाव, ता. दौंड,यांनी यवत पोलीस ठाण्यात धाव घेऊन तक्रार नोंदवली आहे. त्यावरून यवत पोलिसांनी वेदांत व्यवहारे, अभिजीत जगताप, मयुर,कृष्णा गरदडे,,आदर्श चव्हाण,रूद्र जाधव,शौर्य रासकर,रोहन चोरमले,बाबु गडदे, निंबाळकर (सर्व रा. पूर्ण पत्ता माहीत नाही) अशी गुन्हा दाखल करण्यात आलेल्या 10 जणांची नावे आहेत.
पोलिसांनी दिलेल्या माहितीनुसार, अजिंक्य बोरकर हा जवाहरलाल विद्यालयात 12 वीच्या वर्गात शिक्षण घेत आहे. बुधवारी (ता. 02) सकाळी अकरा वाजेच्या सुमारास अजिंक्य हा विद्यालयाच्या गेटसमोरील कॉर्नरवर उभा असताना, जुन्या वादाचा आकस ठेवून आरोपींनी त्याला घेराव घातला.
दरम्यान, आरोपींनी टोळके जमवून अजिंक्यला शिवीगाळ करत बेदम मारहाण सुरू केली. त्यातील एका आरोपीने अजिंक्यच्या थेट कपाळावर आणि डोक्यात दगड मारून त्याला गंभीर जखमी केले. याप्रकरणी वरील सर्वांविरुद्ध यवत पोलीस ठाण्यात गुन्हा दाखल करण्यात आला आहे. या गुन्ह्याचा पुढील सखोल तपास ग्रेड पोलीस उपनिरीक्षक गाडेकर करत आहेत.
