पुणे : दिवाळी सणाच्या काळात प्रवाशांची होणारी गर्दी लक्षात घेऊन खासगी बसचालकांकडून जास्त भाडे वसूल केले जाण्याची शक्यता असते. या पार्श्वभूमीवर, शासनाने निश्चित केलेल्या दरापेक्षा अधिक भाडे आकारल्यास संबंधित बस मालकांवर कडक कारवाई केली जाईल, असा स्पष्ट इशारा पुणे प्रादेशिक परिवहन अधिकारी अर्चना गायकवाड यांनी दिला आहे. मोटर वाहन कायदा, 1988 आणि त्याअंतर्गत असलेल्या नियमांनुसार ही कारवाई करण्यात येईल.
प्रवाशांची आर्थिक लूट थांबवणे तसेच रस्ते सुरक्षिततेला प्राधान्य देणे या उद्देशाने नुकतीच प्रादेशिक परिवहन कार्यालय, पुणे येथे एक महत्त्वाची बैठक पार पडली. या बैठकीत उपप्रादेशिक परिवहन अधिकारी स्वप्निल भोसले, परिविक्षाधीन सहायक प्रादेशिक परिवहन अधिकारी राहुल फसले, रोहित आर्सुळ आणि बसमालक संघटनेचे 26 प्रतिनिधी सहभागी झाले होते.
20 एप्रिल 2018 रोजीच्या शासकीय निर्णयानुसार खासगी बसमालकांना निश्चित केलेल्या मर्यादेतच तिकीट दर ठेवणे अनिवार्य आहे. या नियमाचे उल्लंघन करणाऱ्यांवर यंदाच्या दिवाळीत विशेष पथकांमार्फत बारकाईने लक्ष ठेवले जाणार आहे.
सोबतच प्रवाशांच्या सुरक्षेसाठी चालकांनी गाडी चालवताना मोबाईलचा वापर करू नये, दारू पिऊन वाहन चालवू नये आणि वेगाचे सर्व नियम पाळावेत, अशा सूचना देण्यात आल्या आहेत. तसेच वाहनाची सर्व आवश्यक कागदपत्रे आणि परवाने वैध असणे गरजेचे आहे.
जर कोणत्याही प्रवाशाकडून ठरवून दिलेल्या भाड्यापेक्षा जास्त पैसे वसूल केले गेले किंवा नियमांचा भंग झाल्याचे आढळले, तर त्यांनी घाबरून न जाता तक्रार नोंदवावी. प्रवाशांनी आपले नाव, मोबाईल क्रमांक आणि तिकिटाचा फोटो 8275330209 या व्हॉट्सॲप क्रमांकावर पाठवून आपली तक्रार नोंदवावी, असे आवाहन प्रादेशिक परिवहन कार्यालयाकडून करण्यात आले आहे.
