आदित्य बोराटे
इंदापूर: मराठा समाजाच्या प्रलंबित मागण्यांकडे शासनाचे लक्ष वेधण्यासाठी तसेच मनोज जरांगे-पाटील यांच्या उपोषणाची दखल घेऊन शासनाने तातडीने ठोस निर्णय घ्यावा, या मागणीसाठी सकल मराठा समाज, इंदापूर तालुक्याच्या वतीने गुरुवारी (दि. ३ सप्टेंबर) हिंगणगाव येथे रास्ता रोको आंदोलन करण्यात आले. या आंदोलनामुळे पुणे-सोलापूर राष्ट्रीय महामार्गावर काही काळ वाहतुकीचा खोळंबा झाला असून, वाहनांच्या लांबच लांब रांगा लागल्या होत्या.
हिंगणगाव येथे सकाळी अकरा वाजण्याच्या सुमारास सकल मराठा समाजाच्या कार्यकर्त्यांनी एकत्र येत रास्ता रोको आंदोलन केले. मराठा समाजाच्या विविध प्रलंबित मागण्यांबाबत शासनाने सकारात्मक आणि तातडीची भूमिका घ्यावी, अशी मागणी यावेळी करण्यात आली.
आंदोलनानंतर उपविभागीय पोलिस अधिकारी चैतन्य कदम आणि इंदापूर पोलिस ठाण्याचे पोलिस निरीक्षक विलास नाळे यांना सकल मराठा समाजाच्या वतीने निवेदन देण्यात आले. निवेदनाद्वारे मनोज जरांगे-पाटील यांच्या उपोषणाची शासनाने गांभीर्याने दखल घ्यावी, तसेच मराठा समाजाच्या मागण्यांवर ठोस निर्णय घ्यावा, अशी मागणी करण्यात आली.
प्रलंबित मागण्यांवर तातडीने निर्णयाची मागणी
मराठा समाजाला न्याय मिळण्यासाठी आवश्यक कुणबी नोंदी, जात प्रमाणपत्राशी संबंधित प्रक्रिया तसेच हैदराबाद, सातारा व कोल्हापूर गॅझेटियर आणि उपलब्ध ऐतिहासिक व महसुली नोंदींच्या आधारे पात्र मराठा बांधवांना न्याय देण्यासाठी शासनाने आवश्यक निर्णय तातडीने घ्यावा, अशी मागणी निवेदनात करण्यात आली आहे.
तसेच केवळ आश्वासनांवर न थांबता मागण्यांची निश्चित कालमर्यादेत अंमलबजावणी करावी. मनोज जरांगे-पाटील यांच्या आंदोलनाबाबत शासनाने तातडीने उच्चस्तरीय चर्चा करून कायदेशीर व समाधानकारक तोडगा काढावा, अशी भूमिकाही सकल मराठा समाजाने मांडली.
महामार्गावर वाहनांच्या लांबच लांब रांगा
रास्ता रोको आंदोलनामुळे पुणे-सोलापूर राष्ट्रीय महामार्गावरील वाहतूक काही काळ विस्कळीत झाली. महामार्गाच्या दोन्ही बाजूंना वाहनांच्या लांबच लांब रांगा लागल्याने प्रवाशांना वाहतूक सुरळीत होण्याची प्रतीक्षा करावी लागली. दरम्यान, पोलिसांनी परिस्थितीवर नियंत्रण ठेवत वाहतूक सुरळीत करण्यासाठी आवश्यक नियोजन केले.
मराठा समाजाच्या मागण्यांबाबत शासनाने तातडीने ठोस निर्णय न घेतल्यास आंदोलनाची पुढील दिशा ठरविण्यात येईल, असा इशारा सकल मराठा समाजाच्या वतीने देण्यात आला. आंदोलन शांततेत पार पडले.यावेळी पोलिसांनी मोठ्या प्रमाणावर बंदोबस्त तैनात केला होता.
