पुणे: पुण्यात एफएल-३ परवाना आणि मायक्रो ब्रुअरीची फाईल मंजूर करण्यासाठी लाच मागितल्याच्या आरोपावरून उत्पादन शुल्क विभागाच्या निरीक्षकाला लाचलुचपत प्रतिबंधक विभागाने अटक केली आहे. जितेंद्र हरिश्चंद्र पाटील (वय ४७), इन्स्पेक्टर, एक्साईज डिपार्टमेंट, एच झोन, शास्त्रीनगर, येरवडा असे अटक करण्यात आलेल्या अधिकाऱ्याचे नाव आहे.
याप्रकरणी ३७ वर्षीय लायसन्स कन्सल्टंटने लाचलुचपत प्रतिबंधक विभागाकडे तक्रार केली होती. तक्रारदार एका फर्मसाठी एफएल-३ परवाना मिळवण्याच्या प्रक्रियेत काम करत होते. संबंधित फाईल मंजुरीसाठी पुढे पाठवण्यासाठी १२ लाख रुपये, तर त्याच फर्मच्या मायक्रो ब्रुअरीची फाईल मंजूर करण्यासाठी आणखी ८ लाख रुपये, अशी एकूण २० लाख रुपयांची लाच मागितल्याचा आरोप तक्रारीत करण्यात आला होता.
तक्रारीनंतर एसीबीकडून १३ एप्रिल, २१ मे आणि २२ मे रोजी तक्रारीची पडताळणी करण्यात आली. या पडताळणीदरम्यान जितेंद्र पाटील यांनी तक्रारदाराकडे एकूण २२ लाख रुपयांची लाच मागितल्याचे निष्पन्न झाले. त्यानंतर तडजोडीअंती ११ लाख रुपये देण्याचे ठरल्याचे एसीबीने नमूद केले आहे.
या प्रकरणी १० ऑगस्ट २०२६ रोजी येरवडा पोलीस ठाण्यात भ्रष्टाचार प्रतिबंधक अधिनियम १९८८ मधील कलम ७ अंतर्गत गुन्हा दाखल करण्यात आला. त्यानंतर एसीबीने जितेंद्र पाटील यांना त्याच दिवशी सायंकाळी ५ वाजून १० मिनिटांनी अटक केली.
या कारवाईचे नेतृत्व पोलीस उपअधीक्षक सतीश वाळके यांनी केले. पोलीस अधीक्षक शिरीष सरदेशपांडे आणि अपर पोलीस अधीक्षक अजित पाटील यांच्या मार्गदर्शनाखाली एसीबीच्या पथकाने ही कारवाई केली. लाच मागणाऱ्या लोकसेवकांविरोधात नागरिकांनी पुढे येऊन तक्रार करावी, असे आवाहन लाचलुचपत प्रतिबंधक विभागाने केले आहे.
